夜半琴詩
《夜半琴詩》Iā-puànn Khîm-si
陳一郎Tân It-lông
——————————————
風雨聲音啊彈琴詩
hong-ú siann-im–ah tuânn khîm-si
烏雲啊密佈監獄邊
oo-hûn–ah bi̍t-pòo kann-ga̍k pinn
夜鶯聲聲訴哀悲
iā-ing siann-siann sòo ai-pi
親像叫阮的名字
tshin-tshiūnn kiò gún ê miâ-jī
若是想起當啊初時
nā-sī siūnn-khí tong–ah tshue-sî
心酸目屎強欲滴
sim-sng ba̍k-sái kiōng-bueh tih
青春毋知佗位去
tshing-tshun m̄-tsai tó-uī khì
雨水怎樣落袂離
hōo-tsuí tsuánn-iūnn lo̍h buē-lī
孤單過著啊風雨暝
koo-tuann kuè tio̍h–ah hong-hōo mî
入獄啊已經有三年
ji̍p-ga̍k–ah í-king ū sann-nî
朋友袂得通相見
pîng-iú buē-tit-thang sio-kìnn
浪子深深來覺醒
lōng-tsú tshim-tshim lâi kak-tshínn
過去做著歹啊代誌
kuè-khì tsuè tio̍h pháinn–ah tāi-tsì
連累爸母佮妻兒
liân-luī pē-bú kah tshe-jî
如今反悔已經遲
jû-kim huán-hué í-king tî
只好忍耐拖落去
tsí-hó jím-nāi thua–lo̍h-khì
窗外風雨啊落袂停
thang-guā hong-ú–ah lo̍h buē-thîng
心頭啊猶原袂平靜
sim-thâu–ah iu-guân buē pîng-tsīng
人人講阮放蕩兒
lâng-lâng kóng gún hòng-tōng-jî
暗暗唱出斷腸詩
àm-àm tshiùnn-tshut tuān-tn̂g-si
若是想起出啊獄時
nā-sī siūnn-khí tshut–ah ga̍k sî
毋知著愛等幾年
m̄-tsai tio̍h-ài tán kuí nî
夜半琴詩帶悲意
iā-puànn khîm-si tài pi-ì
何時才會出頭天
hô-sî tsiah ē tshut-thâu-thinn
