愛情像風颱
《愛情像風颱》Ài-tsîng Tshiūnn Hong-thai
文鶯Bûn-ing
——————————————
愛情若親像眠夢
ài-tsîng ná-tshin-tshiūnn bîn-bāng
沉在夢裡心茫茫
tîm tsāi bāng–lí sim bâng-bâng
醒來時
tshínn–lâi sî
頭殼楞楞
thâu-khak gông-gông
毋知西抑東
m̄-tsai sai ia̍h tang
阮毋敢閣再沉落
gún m̄-kánn koh-tsài tîm-lo̍h
啊~愛情的美夢
ah~ ài-tsîng ê bí-bāng
沉落愛情的美夢
tîm-lo̍h ài-tsîng ê bí-bāng
愛情若親像芳酒
ài-tsîng ná-tshin-tshiūnn phang-tsiú
醉在酒中心綿綿
tsuì tsāi tsiú-tiong sim mî-mî
醒來時
tshínn–lâi sî
心神茫茫
sim-sîn bâng-bâng
毋知地抑天
m̄-tsai tuē ia̍h thinn
阮毋敢閣再鼻著
gún m̄-kánn koh-tsài phīnn-tio̍h
啊~愛情的酒味
ah~ ài-tsîng ê tsiú-bī
鼻著愛情的酒味
phīnn-tio̍h ài-tsîng ê tsiú-bī
愛情若親像風颱
ài-tsîng ná-tshin-tshiūnn hong-thai
瘋狂風雨亂亂來
hong-kông hong-hōo luān-luān-lâi
過了時一片混亂
kè–liáu sî tsi̍t-phiàn hūn-luān
毋知山抑海
m̄-tsai suann ia̍h hái
阮毋願閣再受著
gún m̄-guān koh-tsài siū-tio̍h
啊~風颱的被害
ah~ hong-thai ê pī-hāi
愛情風颱的被害
ài-tsîng hong-thai ê pī-hāi
