青春的男兒
《青春的男兒》Tshing-tshun ê Lâm-jî
洪一峰Âng It-hong
——————————————
啉燒酒合趣味
lim sio-tsiú ha̍h tshù-bī
社會交陪重仁義
siā-huē kau-puê tiōng jîn-gī
最討厭假情假義
tsuè thó-ià ké-tsîng ké-gī
對阮膏膏纏
tuì gún ko-ko-tînn
朋友啊來乾杯
pîng-iú–ah lâi kan-pue
憂愁顛倒違背天
iu-tshiû tian-tò uî-puē thinn
好歹運由在伊去
hó-pháinn ūn iû-tsāi i khì
何必想規暝
hô-pit siūnn kui-mî
拄風勢靠勇氣
tú hong-sè khò ióng-khì
爽爽快快過日子
sóng-sóng-khuài-khuài kè ji̍t-tsí
阮就是歡喜自由
gún tsiū-sī huann-hí tsū-iû
青春的男兒
tshing-tshun ê lâm-jî
談愛情是合理
tâm ài-tsîng sī ha̍p-lí
愛看對方的熱意
ài khuànn tuì-hng ê jia̍t-ì
無希望拚生拚死
bô hi-bāng piànn-sinn-piànn-sí
為愛賭意志
uī ài tóo ì-tsì
妹妹啊請原諒
muē-muē–ah tshiánn guân-liōng
毋免悲傷心空虛
m̄-bián pi-siong sim khang-hi
有緣份心情投機
ū iân-hūn sim-tsîng tâu-ki
自然會順序
tsū-jiân ē sūn-sī
遇風勢靠智氣
gū hong-sè khò tì-khì
爽爽快快過日子
sóng-sóng-khuài-khuài kè ji̍t-tsí
阮就是歡喜自由
gún tsiū-sī huann-hí tsū-iû
青春的男兒
tshing-tshun ê lâm-jî
揣前程趁這時
tshē tsiân-tîng thàn tsit-sî
趁著年青有理志
thàn tio̍h nî-tshing ū lí-tsì
毋通來為酒為色
m̄-thang lâi uī tsiú uī sik
耽誤青春期
tam-gōo tshing-tshun-kî
兄弟啊愛立志
hiann-tī–ah ài li̍p-tsì
克服困難順時機
khik-ho̍k khùn-lân sūn sî-ki
大家唱最後勝利
tāi-ke tshiùnn tsuè-āu sìng-lī
理想的歌詩
lí-sióng ê kua-si
拄風勢靠義氣
tú hong-sè khò gī-khì
爽爽快快過日子
sóng-sóng-khuài-khuài kè ji̍t-tsí
阮就是歡喜自由
gún tsiū-sī huann-hí tsū-iû
青春的男兒
tshing-tshun ê lâm-jî
