莫閣拚老命
《莫閣拚老命》Mài Koh Piànn Lāu-miā
李明洋Lí Bîng-iông
——————————————
客廳雖然無偌闊
kheh-thiann sui-jiân bô guā khuah
不時聽著
put-sî thiann-tio̍h
咱溫暖的笑聲
lán un-luán ê tshiò-siann
灶跤雜菜滷規鼎
tsàu-kha tsa̍p-tshài lóo kui tiánn
照顧著規家伙三頓飽
tsiàu-kòo tio̍h kui-ke-hué sann-tǹg pá
寒冷霜風天
hân-líng sng-hong thinn
媽媽洗衫補針線
má-mah sé-sann póo tsiam-suànn
一針一線
tsi̍t-tsiam tsi̍t-suànn
疼入阮心肝
thiànn ji̍p gún sim-kuann
日頭赤焱焱
ji̍t-thâu tshiah-iānn-iānn
爸爸出外去拍拚
pá-pah tshut-guā khì phah-piànn
揹著苦心
phāinn tio̍h khóo-sim
用愛共阮晟
iōng ài kā gún tshiânn
我親愛爸爸媽媽
guá tshin-ài pá-pah má-mah
請恁毋通閣拚老命
tshiánn lín m̄-thang koh piànn lāu-miā
恁的向望
lín ê ǹg-bāng
我來擔
guá lâi tann
—
看著家己的孩兒
khuànn-tio̍h ka-kī ê hâi-jî
漸漸咧大漢
tsiām-tsiām teh tuā-hàn
才知做人爸母的操煩
tsiah tsai tsuè lâng pē-bú ê tshau-huân
為著幸福的美夢
uī-tio̍h hīng-hok ê bí-bāng
我會去拍拚
guá ē khì phah-piànn
毋驚風雨
m̄-kiann hong-hōo
勇敢向前行
ióng-kám hiòng-tsiân kiânn
我親愛爸爸媽媽
guá tshin-ài pá-pah má-mah
請恁毋通閣拚老命
tshiánn lín m̄-thang koh piànn lāu-miā
恁著勇健
lín tio̍h ióng-kiānn
予我來疼
hōo guá lâi thiànn
