五更鼓

《五更鼓》Gōo-kinn Kóo
江蕙 Kang Huī
——————————————
一更的更鼓月照山
tsi̍t-kinn ê kinn-kóo ge̍h tsiò suann
牽君仔的手摸心肝
khan kun-á ê tshiú bong sim-kuann
阿君問娘欲按怎
a-kun mn̄g niû beh án-tsuánn
隨在阿君的心肝
suî-tsāi a-kun ê sim-kuann

二更的更鼓月照埕
jī-kinn ê kinn-kóo ge̍h tsiò tiânn
牽君仔的手入繡廳
khan kun-á ê tshiú ji̍p siù-thiann
鴛鴦相好天註定
uan-iunn siong-hó thinn tsù-tiānn
別人言語毋通聽
pa̍t-lâng giân-gí m̄-thang thiann

三更的更鼓月照窗
sann-kinn ê kinn-kóo ge̍h tsiò thang
牽君仔的手入繡房
khan kun-á ê tshiú ji̍p siù-pâng
你咱相好有所望
lí-lán siong-hó ū sóo bāng
佮君永遠結相隨
kah kun íng-uán kiat sio-suî

四更的更鼓月照門
sì-kinn ê kinn-kóo ge̍h tsiò mn̂g
牽君仔的手入繡床
khan kun-á ê tshiú ji̍p siù-tshn̂g
雙人相好有所向
siang-lâng siong-hó ū sóo ǹg
較好燒水泡冰糖
khah hó sio-tsuí phàu ping-thn̂g

五更的更鼓天漸光
gōo-kinn ê kinn-kóo thinn tsiām kng
我君仔欲轉心頭鑽
guá kun-á beh tńg sim-thâu tsǹg
滿腹心情漸漸悶
muá-pak sim-tsîng tsiām-tsiām būn
頭眩目暗面青黃
thâu-hîn-ba̍k-àm bīn tshinn-n̂g