半暝兩點

由陳文傑 · 2021 年 4 月 5 日

行袂過的心
kiânn buē kuè ê sim

放袂落的人
pàng buē lo̍h ê lâng

只有放下
tsí-ū hòng-hā

才會當踏出新的未來
tsiah ē-tàng ta̍h-tshut sin ê bī-lâi

答滴滴的雨水
tah-tih-tih ê hōo-tsuí

一點仔停的意思攏無
tsi̍t-tiám-á thîng ê ì-sù lóng bô

閃爍爍的路燈
siám-sih-sih ê lōo-ting

一時仔化閣一時仔著
tsi̍t-sî-á hua koh tsi̍t-sî-á to̍h

趕緊緊的生活
kuánn-kín-kín ê sing-ua̍h

予家己時間愈來愈少
hōo ka-tī sî-kan lú lâi lú tsió

來來去去的人情留佇佗
lâi-lâi-khì-khì ê jîn-tsîng lâu tī toh

行到這个年紀
kiânn kàu tsit ê nî-kí

無啥物需要問天
bô siánn-mih su-iàu mn̄g thinn

滾滾的心漸漸也冷去
kún-kún ê sim tsiām-tsiām iā líng–khì

一直講無出喙的話
it-ti̍t kóng bô tshut-tshuì ê uē

猶原紮咧身邊
iu-guân tsah-leh sin-pinn

我想猶是永遠莫講開
guá siūnn iá-sī íng-uán mài kóng khui

過去啦再會
kuè-khì–lah tsài-huē

再會過去

tsài-huē kuè-khì

半暝兩點離開
puànn-mî nn̄g tiám lī-khui