七字仔調
《七字仔調》Tshit-jī-á-tiāu
安童An-tông
——————————————
秋風吹來草木黃
tshiu-hong tshue–lâi tsháu-bo̍k n̂g
思思念念心酸酸
su-su-liām-liām sim-sng-sng
為著阿娘袂食睏
uī-tio̍h a-niû buē tsia̍h-khùn
性命強欲見閻君
sènn-miā kiōng-bueh kìnn Giâm-kun
世間查某真正濟
sè-kan tsa-bóo tsin-tsiànn tsuē
偏偏為你咧痴迷
phian-phian uī lí teh tshi-bê
莫非前世相欠債
bo̍k-hui tsîng-sì sio-khiàm-tsè
Do Re Mi Fa 胡椒攪酸醋
Do Re Mi Fa hôo-tsio kiáu sng-tshòo
黃腫胮閣落屎吐
n̂g-tsíng hàng koh làu-sái thòo
如今害我咧夯枷
jû-kim hāi guá teh giâ-kê
火燒罟寮全無望
hué-sio koo-liâu tsuân bô-bāng
擔砂坉海了戇工
tann-sua thūn-hái liáu gōng kang
害阮相思病遮重
hāi gún siunn-si pēnn tsiah tāng
阿娘生媠害死人
a-niû senn suí hāi sí-lâng
第一好囝人講我
tē-it hó-kiánn lâng kóng-guá
鴉片無食筊無跋
a-phiàn bô tsia̍h kiáu bô pua̍h
較媠妹妹欲嫁我
khah suí muē-muē beh kè guá
Do Re Mi Fa 胡椒攪酸醋
Do Re Mi Fa hôo-tsio kiáu sng-tshòo
黃腫胮閣落屎吐
n̂g-tsíng hàng koh làu-sái thòo
嫁我清閒免拖磨
kè guá tshing-îng bián thua-buâ
這爿看過彼爿崙
tsit pîng khuànn kuè hit pîng lūn
看著阿娘紅喙脣
khuànn-tio̍h a-niû âng tshuì-tûn
盈暗想欲佮你睏
îng-àm siūnn-bueh kah lí khùn
上驚恁翁轉來巡
siōng kiann lín ang tńg-lâi sûn
這爿看過彼爿港
tsit pîng khuànn kuè hit pîng káng
看著海水青櫳櫳
khuànn-tio̍h hái-tsuí tshinn lang-lang
燒酒來啉話來講
sio-tsiú lâi lim uē lâi káng
Do Re Mi Fa 胡椒攪酸醋
Do Re Mi Fa hôo-tsio kiáu sng-tshòo
黃腫胮閣落屎吐
n̂g-tsíng hàng koh làu-sái thòo
問娘早前嬈啥人
mn̄g niû tsá-tsîng hiâu siánn-lâng
這爿看過彼爿溪
tsit pîng khuànn kuè hit pîng khe
看著阿美仔過溪
khuànn-tio̍h a-Bí-á kuè khe
問娘契兄有幾个
mn̄g niû khè-hiann ū kuí-ê
零星無講一萬个
lân-san bô kóng tsi̍t-bān-ê
Do Re Mi Fa 胡椒攪酸醋
Do Re Mi Fa hôo-tsio kiáu sng-tshòo
黃腫胮閣落屎吐
n̂g-tsíng hàng koh làu-sái thòo
