送君珠淚滴

《送君珠淚滴》Sàng Kun Tsu-luī Tih

丁黛 Ting Tāi

—————————————–

一路送君到車站

tsi̍t-lōo sàng kun kàu tshia-tsām

兩人情份毋甘放

nn̄g-lâng tsîng hūn m̄-kam pàng

依依難捨心沉重

i-i-lân-siá sim-tîm tāng

煞來目箍紅

suah lâi ba̍k-khoo âng

望君真心相疼痛

bāng kun tsin-sim sio thiànn-thàng

為君守空房

uī kun siú khang-pâng

咱情意毋通袂記

lán tsîng-ì m̄-thang buē-kì

我是你的人

guá sī lí ê lâng

兩人離別越頭看

nn̄g lâng lî-pia̍t ua̍t-thâu khuànn

點點珠淚滴袂煞

tiám-tiám tsu-luī tih buē-suah

親像真珠拍斷線

tshin-tshiūnn tsin-tsu phah-tn̄g suànn

傷心送情伴

siong-sim sàng tsîng-phuānn

為國服務著出外

uī kok ho̍k-bū tio̍h tshut-guā

甘願來拖磨

kam-guān lâi thua-buâ

在軍中著愛保重

tsāi kun-tiong tio̍h-ài pó-tiōng

毋通受風寒

m̄-thang siū hong-kuânn

三聲無奈愛分開

sann siann bô-nāi ài hun-khui

我是堅心咧愛你

guá sī kian-sim teh ài lí

心情堅定才應該

sim-tsîng kian-tīng tsiah ìng-kai

寫批予我知

siá phue hōo guá tsai

為君思情暗悲哀

uī kun su-tsîng àm pi-ai

期待倒轉來

kî-thāi tò-tńg–lâi

阮毋管三年五冬

gún m̄-kuán sann-nî-gōo-tang

也是欲等待

iā-sī bueh tán-thāi