英雄出少年
《英雄出少年》Ing-hiông Tshut Siàu-liân
合唱ha̍p-tshiùnn
——————————————
嘿~嘿!人講英雄出少年
heh~heh! lâng kóng íng-hiông tshut siàu-liân
宜蘭蔣渭水是頭一个
Gî-lân Tsiúnn Uī-suí sī thâu tsi̍t-ê
聰明豪爽又飄撇
tshong-bîng hô-sóng iū phiau-phiat
真正是緣投的少年家
tsin-tsiànn sī iân-tâu ê siàu-liân-ke
細漢伊是讀漢學
sè-hàn i sī tha̍k hàn-o̍h
四書五經攏會曉背
sù-su ngóo-king lóng ē-hiáu puē
媽祖廟口的算命仙
má-tsóo-biō-kháu ê sǹg-miā-sian
蔣老番就是怹老爸
Tsiúnn Lāu-huan tiō-sī in lāu-pē
蔣老番毋管這馬
Tsiúnn Lāu-huan m̄-kuán tsit-má
是啥物朝代
sī siánn-mih tiâu-tē
頭殼只有清朝的皇帝
thâu-khak tsí-ū Tshing-tiâu ê hông-tè
算命起童又跋桮
sǹg-miā khí-tâng iū pua̍h-pue
怹囝頭殼嘛綴伊玲瑯踅啦
in kiánn thâu-khak mā tuè i lin-long se̍h–lah
渭水少年嘛做童乩
Uī-suí siàu-liân mā tsò tâng-ki
有一工雄雄來覺醒
ū-tsi̍t-kang hiông-hiông lâi kak-tshénn
講伊少年懵懂太痴迷
kóng i siàu-liân bóng-tóng thài tshi-bê
漢學讀到十六歲
hàn-o̍h tha̍k kah tsa̍p-la̍k huè
才入宜蘭公學校來讀冊
tsiah ji̍p Gî-lân kong-ha̍k-hāu lâi tha̍k-tsheh
別人讀冊讀六年
pa̍t-lâng tha̍k-tsheh tha̍k la̍k-nî
阿水伊讀兩年就畢業好勢
A-tsuí i tha̍k nn̄g-nî tō pit-gia̍p hó-sè
