無字的情批
《無字的情批》Bô Jī ê Tsîng-phue
黃乙玲 N̂g It-lîng
—————————-
阿媽毋捌字
a-má m̄ bat-jī
但是伊捌真濟的代誌
tān-sī i bat tsin tsuē ê tāi-tsì
伊講閃電是天的鎖匙
i kóng siám-tiān sī thinn ê só-sî
鎖匙拍開有雨水
só-sî phah khui ū hōo-tsuí
阿媽毋捌字
a-má m̄ bat-jī
但是有一張情批寫予伊
tān-sī ū tsi̍t tiunn tsîng-phue siá hōo i
經過幾十年毋捌拆開
king-kuè kuí tsa̍p nî m̄-bat thiah-khui
伊講寫字不如相思
i kóng siá-jī put-jû siunn-si
我愛的伊 欲來離開
guá ài ê i, beh lâi lī-khui
伊講孤單上適合伊
i kóng koo-tuann siōng sik-ha̍p i
無留半字 就斷了過去
bô lâu puànn jī, tō tn̄g liáu kuè-khì
毋甘心付出 為伊吼規暝
m̄-kam-sim hù-tshut, uī i háu kui-mî
我愛的伊 欲來離開
guá ài ê i, beh lâi lī-khui
伊講孤單上適合伊
i kóng koo-tuann siōng sik-ha̍p i
山盟海誓 也失去意義
san-bîng-hái-sè, iā sit-khì ì-gī
情批攏無字 癡心變青盲
tsîng-phue lóng bô jī, tshi-sim piàn tshinn-mî
我共阿媽問
guá kā a-má mn̄g
阿媽的情批是寫啥物
a-má ê tsîng-phue sī siá siánn-mih
伊講情人欲愛無勇氣
i kóng tsîng-jîn beh ài bô ióng-khì
才來用字騙情義
tsiah lâi iōng jī phiàn tsîng-gī
(才來用字騙分開)
(tsiah lâi iōng jī phiàn hun-khui)
