厝邊上親
《厝邊上親》Tshù-pinn Siōng Tshin
傅振輝Pòo Tsín-hui
——————————————
有緣做著好厝邊
ū-iân tsuè tio̍h hó tshù-pinn
福氣的人蹛鬥陣
hok-khì ê lâng tuà tàu-tīn
厝邊頭尾
tshù-pinn-thâu-bué
若像一家親
ná-tshiūnn it-ka-tshin
阮兜蹛斡角第三鄰
gún tau tuà uat-kak tē-sann lîn
有閒來坐
ū-îng lâi tsē
咱泡茶來啉
lán phàu-tê lâi lim
俗語講
sio̍k-gí kóng
遠親不如近鄰
uán-tshin put-jû kīn-lîn
打招呼有人來關心
tánn-tsio-hoo ū-lâng lâi kuan-sim
相照顧敦親睦鄰
sio tsiàu-kòo tun-tshin bo̍k-lîn
若拄著代誌
nā tú-tio̍h tāi-tsì
逐家來相伨
ta̍k-ke lâi sio-thīn
樓跤樓頂往會相閃身
lâu-kha lâu-tíng íng ē sio-siám-sin
厝邊隔壁總會見面
tshù-pinn keh-piah tsóng ē kìnn-bīn
好頭喙真心
hó thâu-tshuì tsin-sim
親切又熱心
tshin-tshiat iū jia̍t-sim
遠親不如近鄰
uán-tshin put-jû kīn lîn
厝邊上親
tshù-pinn siōng tshin
