感恩
《感恩》Kám-un
陳思安Tân Su-an
——————————————
隨意踮樹跤坐
suî-ì tiàm tshiū-kha tsē
微微的春風
bî-bî ê tshun-hong
也涼涼仔吹
iā liâng-liâng-á tshue
朋友來歇睏一下
pîng-iú lâi hioh-khùn–tsi̍t-ē
哈一杯茶
ha tsi̍t-pue tê
風吹佇天頂飛
hong-tshue tī thinn-tíng pue
親像是佮人佇咧覕相揣
tshin-tshiūnn sī kah lâng tī-leh bih-sio-tshuē
想著阿爸交代的彼一句話
siūnn-tio̍h a-pa kau-tài ê hit tsi̍t-kù uē
人生毋免要求著啥貨
jîn-sing m̄-bián iau-kiû tio̍h siánn-huè
愛用感恩的心看一切
ài iōng kám-un ê sim khuànn it-tshè
無論好䆀苦甜四序過
bô-lūn hó-bái khóo-tinn sù-sī kuè
袂曉計較的人得上濟
buē-hiáu kè-kàu ê lâng tit siōng tsuē
天頂一輪明月
thinn-tíng tsi̍t-lûn bîng-gue̍h
溫柔的光線
un-jiû ê kng-suànn
照佇阮心底
tsiò tī gún sim-té
我用感恩的心情
guá iōng kám-un ê sim-tsîng
佮你做伙
kah lí tsuè-hué
