討厭的公共汽車

《討厭的公共汽車》Thó-ià ê Kong-kiōng-khì-tshia
四奇士合唱團Sù-kî-sū Ha̍p-tshiùnn-thuân
——————————————
透早出門心輕鬆
thàu-tsá tshut-mn̂g sim khin-sang
沿路唱歌手搖動
iân-lōo tshiùnn-kua tshiú iô-tāng
看見辦公時間到
khuànn-kìnn pān-kong sî-kan kàu
大步用走無越頭
tuā pōo iōng tsáu bô ua̍t-thâu
彼時陣
hit sî-tsūn
公共汽車拄好也來到
kong-kiōng khì-tshia tú-hó iā lâi-kàu
趕緊走來車門前
kuánn-kín tsáu-lâi tshia-mn̂g tsîng
誰知客滿車無停
siáng tsai kheh-buán tshia bô thîng
搭車的人排規陣
tah-tshia ê lâng pâi kui-tīn
車閣無停上蓋害
tshia koh bô thîng siōng-kài hāi
總也著暫時忍耐
tsóng iā tio̍h tsiām-sî jím-nāi
繼續來等待
kè-sio̍k lâi tán-thāi

辦公時間真寶貴
pān-kong sî-kan tsin pó-kuì
搭無汽車上克虧
tah bô khì-tshia siōng khik-khui
已經等了半小時
í-king tán liáu puànn sió-sî
全無看見車到位
tsuân bô khuànn-kìnn tshia kàu-uī
到底是為著啥代
tàu-té sī uī-tio̍h siánn tāi
汽車攏毋來
khì-tshia lóng m̄-lâi
搭車眾人咧議論
tah tshia tsìng-lâng teh gī-lūn
比較行路有較輸
pí-kàu kiânn-lōo ū khah-su
恐驚時間趕袂赴
khióng-kiann sî-kan kuánn buē-hù
大家忍耐罔那跔
tāi-ke jím-nāi bóng ná ku
討厭的公共汽車
thó-ià ê kong-kiōng khì-tshia
全無同情阮
tsuân bô tông-tsîng gún

現在時間八點半
hiān-tsāi sî-kan pueh-tiám-puànn
無去辦公欲按怎
bô khì pān-kong beh án-tsuánn
公司人人會講起
kong-si lâng-lâng ē kóng-khí
大概厝內有代誌
tāi-khài tshù-lāi ū tāi-tsì
實在是搭無車幫
si̍t-tsāi sī tah bô tshia-pang
明明氣死人
bîng-bîng khì-sí lâng
看著汽車來到位
khuànn-tio̍h khì-tshia lâi kàu-uī
大家趕緊欲相爭
tāi-ke kuánn-kín beh sio-tsinn
彼時車掌發脾氣
hit-sî tshia-tsióng huat phî-khì
叫阮後幫才坐起
kiò gún āu pang tsiah tsē khí
只有是目睭金金
tsí-ū sī ba̍k-tsiu kim-kim
送車開行去
sàng tshia khui kiânn-khì