有緣再相見
《有緣再相見》Ū-iân Tsài Siong-kìnn
四奇士合唱團Sù-kî-sū Ha̍p-tshiùnn-thuân
——————————————
做男兒賭著意志
tsuè lâm-jî tóo tio̍h ì-tsì
離開著鄉里
lī-khui tio̍h hiong-lí
無論是拄風拄雨
bô-lūn sī tú-hong tú-hōo
毋願來心哀悲
m̄-guān lâi sim ai-pi
放捒著放捒著
pàng-sak tio̍h pàng-sak tio̍h
痴情戀夢
tshi-tsîng luân-bāng
再會啦再會啦
tsài-huē–lah tsài-huē–lah
心愛好情侶
sim-ài hó tsîng-lī
啊~毋通心稀微
ah~ m̄-thang sim hi-bî
快樂過日子
khuài-lo̍k kè ji̍t-tsí
靠青春
khò tshing-tshun
倚靠青春
uá-khò tshing-tshun
爭取著名利
tsing-tshú tio̍h miâ-lī
毋管是酸苦甘甜
m̄-kuán sī sng-khóo kam-tinn
抱定著堅心意
phō-tiānn tio̍h kian-sim-ì
閃開著閃開著
siám-khui tio̍h siám-khui tio̍h
薰酒芳味
hun-tsiú phang-bī
再會啦再會啦
tsài-huē–lah tsài-huē–lah
心愛好情侶
sim-ài hó tsîng-lī
啊~毋通來懷疑
ah~ m̄-thang lâi huâi-gî
男性無情義
lâm-sìng bô tsîng-gī
做男兒顧著將來
tsuè lâm-jî kòo tio̍h tsiong-lâi
忍耐著稀微
jím-nāi tio̍h hi-bî
無論是海角天邊
bô-lūn sī hái-kak thinn-pinn
總也著拚來去
tsóng iā tio̍h piànn–lâi-khì
來試著來試著
lâi tshì tio̍h lâi tshì tio̍h
男性力量
lâm-sìng li̍k-liōng
再會啦再會啦
tsài-huē–lah tsài-huē–lah
心愛好情侶
sim-ài hó tsîng-lī
啊~毋通珠淚滴
ah~ m̄-thang tsu-luī tih
有緣再相見
ū-iân tsài siong-kìnn
