重逢高雄港
《重逢高雄港》Tiông-hông Ko-hiông-káng
甜咪咪Tinn-mi-mi
——————————————
歡喜著船咧欲入港
huann-hí tio̍h tsûn tih-beh ji̍p-káng
心情齊輕鬆
sim-tsîng tsiâu khin-sang
彼日港邊送伊出航
hit ji̍t káng-pinn sàng i tshut-hâng
已經過三冬
í-king kuè sann-tang
今日接著
kim-ji̍t tsiap-tio̍h
情郎轉來快樂的事項
tsîng-lông tńg-lâi khuài-lo̍k ê sū-hāng
予阮心內礗礗縍縍
hōo gún sim-lāi pin-pin-pòng-pòng
吐出大氣心跳弄
thòo tshut tuā-khuì sim thiàu-lāng
期待欲見行船的人
kî-thāi beh kìnn kiânn-tsûn ê lâng
重逢高雄港
tiông-hông Ko-hiông-káng
心愛的人
sim-ài ê lâng
可愛的人
khó-ài ê lâng
歡喜你船入港
huann-hí lí tsûn ji̍p-káng
黃昏天色漸漸變暗
hông-hun thinn-sik tsiām-tsiām piàn àm
心情挐氅氅
sim-tsîng jû-tsháng-tsháng
為何看無心愛的人
uī-hô khuànn-bô sim-ài ê lâng
害阮心茫茫
hāi gún sim bâng-bâng
明明講伊今日
bîng-bîng kóng i kim-ji̍t
船隻一定欲回航
tsûn-tsiah it-tīng beh huê-hâng
多情海鳥啼啼叫叫
to-tsîng hái-tsiáu thî-thî-kiò-kiò
替阮呼喚你一人
thè gún khoo-huàn lí tsi̍t-lâng
著急欲見行船的人
tio̍h-kip beh kìnn kiânn-tsûn ê lâng
重逢高雄港
tiông-hông Ko-hiông-káng
思慕的人
su-bōo ê lâng
難忘的人
lân-bōng ê lâng
期待你船入港
kî-thāi lí tsûn ji̍p-káng
已經看著
í-king khuànn-tio̍h
心愛的人伊的船入港
sim-ài ê lâng i ê tsûn ji̍p-káng
天邊月娘水底搖動
thinn-pinn gue̍h-niû tsuí-té iô-tāng
笑阮目箍紅
tshiò gún ba̍k-khoo âng
毋驚海風波浪偌大
m̄-kiann hái-hong pho-lōng guā tuā
今日無白等
kim-ji̍t bô pe̍h-tán
為你一人思思念念
uī lí tsi̍t-lâng su-su-liām-liām
希望重溫春宵夢
hi-bāng tiông-un tshun-siau bāng
雙手攬著行船的人
siang-tshiú lám tio̍h kiânn-tsûn ê lâng
重逢高雄港
tiông-hông Ko-hiông-káng
思念的人
su-liām ê lâng
懷念的人
huâi-liām ê lâng
歡喜你船入港
huann-hí lí tsûn ji̍p-káng
