三心兩意
《三心兩意》Sam-sim Lióng-ì
張美雲Tiunn Bí-hûn
——————————————
想著頂日仔彼个少年家
siūnn-tio̍h tíng-ji̍t-á hit ê siàu-liân-ke
規暗心肝像彈琵琶
kui-àm sim-kuann tshiūnn tuânn gî-pê
到底毋知啥人的子弟
tàu-tí m̄-tsai siánn-lâng ê tsú-tē
阮來配伊毋真好勢
gún lâi phuè i m̄ tsin hó-sè
想著對面彼个老阿伯
siūnn-tio̍h tuì-bīn hit ê lāu-a-peh
經常對阮來心痴迷
king-siông tuì gún lâi sim tshi-bê
喙鬚鬍鬍看著人就慼
tshuì-tshiu hôo-hôo khuànn tio̍h lâng tō tsheh
毋過徛洋樓錢銀濟
m̄-koh khiā iûnn-lâu tsînn-gûn tsuē
欲對少年的彼个來啊相好
beh tuì siàu-liân ê hit-ê lâi–ah siong-hó
恐驚三頓著兩頓餓
khóng-kiann sann-tǹg tio̍h nn̄g-tǹg gō
欲對老的彼个來啊相好
beh tuì lāu ê hit-ê lâi–ah siong-hó
恐驚將來會起風波
khóng-kiann tsiong-lâi ē khí hong-pho
