紙風吹
《紙風吹》Tsuá-hong-tshue
張艾莉Tiunn Ngāi-lī(鳳娘Hōng-niû)
——————————————
踮在遙遠都市
tiàm-tsāi iâu-uán too-tshī
寂寞的暗暝
tsi̍k-bo̍k ê àm-mî
予阮想起細漢時
hōo gún siūnn-khí sè-hàn sî
紙風吹陪伴的日子
tsuá-hong-tshue puê-phuānn ê ji̍t-tsí
親像聽見
tshin-tshiūnn thiann-kìnn
阮初戀的歡喜
gún tshoo-luân ê huann-hí
故鄉的田園邊
kòo-hiong ê tshân-hn̂g pinn
青春彼當時
tshing-tshun hit-tong-sî
予阮懷念阮的夢
hōo gún huâi-liām gún ê bāng
紙風吹看顧的日子
tsuá-hong-tshue khuànn-kòo ê ji̍t-tsí
伊陪阮的心
i puê gún ê sim
踅過少女時
se̍h kuè siàu-lú sî
心中的紙風吹
sim-tiong ê tsuá-hong-tshue
踅啊踅
se̍h–ah se̍h
風中飄來
hong-tiong phiau lâi
一陣故鄉的氣味
tsi̍t-tsūn kòo-hiong ê khì-bī
細漢時的願望
sè-hàn sî ê guān-bōng
猶原寄佇田園邊
iu-guân kià tī tshân-hn̂g pinn
心中的紙風吹
sim-tiong ê tsuá-hong-tshue
踅啊踅
se̍h–ah se̍h
風微微啊
hong bî-bî–ah
吹起初戀的相思
tshue khí tshoo-luân ê siunn-si
少年時的心事
siàu-liân-sî ê sim-sū
猶原一直踅袂停
iu-guân it-ti̍t se̍h buē-thîng
