媽祖咧看
《媽祖咧看》Má-tsóo Leh Khuànn
徐承邦Tshî Sîng-pang
——————————————
炮仔聲一直叫
phàu-á-siann it-ti̍t kiò
媽祖娘娘欲做醮
Má-tsóo niû-niû beh tsò-tsiò
掛鼓燈結紅綵
kuà kóo-ting kiat âng-tshái
廟前石獅笑咍咍
biō-tsîng tsio̍h-sai tshiò-hai-hai
燒王船水火醮
sio ông-tsûn tsuí-hué tsiò
會場燈篙排規排
huē-tiûnn ting-ko pâi kui pâi
供品濟若像山
kiòng-phín tsē ná-tshiūnn suann
山珍海味載規車
san-tin-hái-bī tsài kui tshia
南北管官將爺
lâm-pak-kuán Kuan-tsiòng-iâ
陣頭辣妹音樂聲
tīn-thâu làmèi im-ga̍k-siann
媽祖轎硩後壁
Má-tsóo-kiō teh āu-piah
千順將軍駕前行
Tshian-sūn-tsiong-kun kà-tsiân kiânn
鬧熱陣拚輸贏
lāu-jia̍t-tīn piànn-su-iânn
規庄親像不夜城
kui-tsng tshin-tshiūnn put-iā-siânn
人客倌緊來坐
lâng-kheh-kuann kín lâi tsē
老街名產上好食
lāu-ke bîng-sán siōng hó-tsia̍h
千里眼看詳細
Tshian-lí-gán khuànn siông-sè
百姓艱苦歹趁食
peh-sìnn kan-khóo pháinn thàn-tsia̍h
順風耳斟酌聽
Sūn-hong-ní tsim-tsiok thiann
貪官惡吏起生驚
tham-kuann ok-lī khí tshinn-kiann
龍泉水金虎爺
lîng-tsuânn-tsuí Kim-hóo-iâ
幫助人人趁好額
pang-tsōo lâng-lâng thàn hó-gia̍h
媽祖婆有咧看
Má-tsóo-pô ū leh khuànn
善惡有報毋是無
siān-ok iú pò m̄-sī bô
