薰酒歌
《薰酒歌》Hun-tsiú Kua
胡美紅 Oô Bí-hông
——————————————
天光窗外鳥啼叫
thinn-kng thang-guā tsiáu thî-kiò
出門做工手那搖
tshut-mn̂g tsuè-kang tshiú ná iô
滿面春風哈哈笑
muá-bīn tshun-hong ha-ha tshiò
友的啊錢著惜
iú–ê-ah, tsînn tio̍h sioh
食薰咱著來食香蕉
tsia̍h-hun lán tio̍h lâi tsia̍h Hiang-tsio
朋友毋通跤手軟
pîng-iú m̄-thang kha-tshiú nńg
毋通失戀心酸酸
m̄-thang sit-luân sim-sng-sng
做工咱為三頓飯
tsuè-kang lán uī sann-tǹg pn̄g
友的啊聽我勸
iú–ê-ah, thiann guá khǹg
食薰咱著來食樂園
tsia̍h-hun lán tio̍h lâi tsia̍h Lo̍k-hn̂g
見著愛人毋敢講
kìnn-tio̍h ài-jîn m̄-kánn kóng
心肝驚驚面發紅
sim-kuann kiann-kiann bīn huat hông
食酒助氣會勇壯
tsia̍h-tsiú tsōo khì ē ióng-tsòng
友的啊欲清爽
iú–ê-ah, beh tshing-sóng
食酒咱著來食芬芳
tsia̍h-tsiú lán tio̍h lâi tsia̍h Hun-hong
青春戀愛三線路
tshing-tshun luân-ài sam-suànn-lōo
路頭常行無生疏
lōo-thâu siông kiânn bô tshinn-soo
酒後最好這地所
tsiú-āu tsuè hó tsit tē-sóo
友的啊有妹顧
iú–ê-ah, ū muē kòo
食酒咱著來食紅露
tsia̍h-tsiú lán tio̍h lâi tsia̍h Âng-lōo
