戀愛的滋味
《戀愛的滋味》Luân-ài ê Tsu-bī
美杏Bí-hīng
——————————————
在世間初戀滋味
tsāi sè-kan tshoo-luân tsu-bī
人人著佮意
lâng-lâng tio̍h kah-ì
可比來啉著咖啡
khó-pí lâi lim tio̍h ka-pi
愈苦心愈甜
jú khóo sim jú tinn
一心是驚人懷疑
tsi̍t-sim sī kiann-lâng huâi-gî
一心閣愛相見
tsi̍t-sim koh ài sio-kìnn
兩个人手牽手
nn̄g-ê lâng tshiú khan-tshiú
走去看天星
tsáu-khì khuànn thinn-tshinn
啊~初戀的人
ah~ tshoo-luân ê lâng
看著心綿綿
khuànn tio̍h sim mî-mî
若是來講起熱戀
nā-sī lâi kóng-khí jia̍t-luân
實在真趣味
si̍t-tsāi tsin tshù-bī
就親像太空火箭
tiō tshin-tshiūnn thài-khong hué-tsìnn
滾滾一直去
kún-kún it-ti̍t khì
毋管是三更半暝
m̄-kuán sī sann-kinn-puànn-mî
毋驚雨水滴
m̄-kiann hōo-tsuí tih
猶原是約束鬥陣
iu-guân sī iok-sok tàu-tīn
墓仔埔也去
bōng-á-poo iā khì
啊~熱戀的人
ah~ jia̍t-luân ê lâng
確實有勇氣
khak-si̍t ū ióng-khì
若是來講起失戀
nā-sī lâi kóng-khí sit-luân
開始的時陣
khai-sí ê sî-tsūn
就親像風颱天的
tsiū tshin-tshiūnn hong-thai-thinn ê
大海的小船
tuā-hái ê sió-tsûn
三頓飯袂食袂吞
sann-tǹg pn̄g buē tsia̍h buē thun
暗時又袂睏
àm-sî iū buē khùn
到底是啥人所害
tàu-tué sī siánn-lâng sóo hāi
實在真可恨
si̍t-tsāi tsin khó hūn
啊~失戀的人
ah~ sit-luân ê lâng
心頭亂紛紛
sim-thâu luān hun-hun
若是來講起苦戀
nā-sī lâi kóng-khí khóo-luân
有影苦憐代
ū-iánn khóo-liân-tāi
明明知袂當結局
bîng-bîng tsai buē-tàng kiat-kio̍k
偏偏伊欲愛
phian-phian i beh ài
太空的原子時代
thài-khong ê guân-tsú sî-tāi
看破才應該
khuànn-phuà tsiah ing-kai
毋通來誤著
m̄-thang lâi gōo tio̍h
你的寶貴的將來
lí ê pó-kuì ê tsiong-lâi
啊~苦戀的人
ah~ khóo-luân ê lâng
請你想看覓
tshiánn lí siūnn khuànn-māi
