阮的愛

《阮的愛》Gún ê Ài
一綾 It-lîng
——————————————
如果你我在這个世界
jû-kó lí guá tsāi tsit-ê sè-kài
天地無仝路
thinn-tē bô-kāng lōo
今生無熟似
kim-sing bô si̍k-sāi
後壁的人生怎安排
āu-piah ê jîn-sing tsuánn an-pâi

如今你我在這个世界
jû-kim lí guá tsāi tsit-ê sè-kài
手牽著未來
tshiú khan-tio̍h bī-lâi
仝命過人海
kāng miā kuè jîn-hái
毋驚風風雨雨的傷害
m̄-kiann hong-hong-ú-ú ê siong-hāi

無論風雨對佗來
bô-lūn hong-hōo tuì toh lâi
酸冷有咱用情排解
sng líng ū lán iōng tsîng pâi-kái
雖然有一點仔傷
sui-jiân ū tsi̍t-tiám-á siong
淡薄仔無奈
tām-po̍h-á bô-nāi

無論日月換幾擺
bô-lūn ji̍t gue̍h uānn kuí pái
春秋予咱用心寫東西
tshun tshiu hōo lán iōng-sim siá tang-sai
雖然有淡薄仔酸
sui-jiân ū tām-po̍h-á sng
一點仔目屎
tsi̍t-tiám-á ba̍k-sái

總是會當佇你的胸坎
tsóng–sī ē-tàng tī lí ê hing-khám
閃避䆀
siám-phiah bái

你是阮的山阮的海
lí sī gún ê suann, gún ê hái
阮的愛
gún ê ài