淡水暮色

《淡水暮色》Tām-tsuí Bōo-sik
洪一峰Âng It-hong
———————————————

日頭將欲沉落西
ji̍t-thâu tsiong beh tîm lo̍h sai
水面染五彩
tsuí-bīn jiám ngóo-tshái
男女老幼咧等待
lâm-lú ló-iù teh tán-thāi
漁船倒轉來
hî-tsûn tò-tńg–lâi
桃色樓窗門半開
thô-sik lâu-thang mn̂g puàn-khai
琴聲訴悲哀
khîm-siann sòo pi-ai
啊~幽怨的心情無人知
ah~ iu-uàn ê sim-tsîng bô lâng tsai

朦朧月色白光線
bông-lông ge̍h-sik pe̍h kng-suànn
浮出紗帽山
phû tshut Se-bō-suann
河流水影色變換
hô lâu tsuí-iánn sik piàn-uānn
海風陣陣寒
hái-hong tsūn-tsūn kuânn
一隻小鳥揣無伴
tsi̍t tsiah sió-tsiáu tshē-bô phuānn
歇在船頭岸
hioh tsāi tsûn-thâu huānn
啊~美妙的 啼叫動心肝
ah~ bí-miāu ê thî-kiò tōng sim-kuann

淡水黃昏帶詩意
Tām-tsuí hông-hun tài si-ì
夜霧罩四邊
iā-bū tà sì-pinn
教堂鐘聲心空虛
kàu-tn̂g tsing-siann sim khang-hi
響對海面去
hiáng tuì hái-bīn khì
埔頂燈光真希奇
poo-tíng ting-kng tsin hi-khî
閃閃像天星
siám-siám tshiūnn thinn-tshinn
啊~難忘的情景引心悲
ah~ lân-bōng ê tsîng-kíng ín sim pi