烏白舞
《烏白舞》Oo-pe̍h-bú
施文彬 Si Bûn-pin
武雄 Bú-hiông
——————————————
人䆀怪爸母
lâng bái kuài pē-bú
命䆀怪政府
miā bái kuài tsìng-hú
頭殼䆀怪歷史
thâu-khak bái kuài li̍k-sú
啊若起毛䆀
ah nā khí-moo bái
咱來烏白舞
lán lâi oo-pe̍h-bú
運䆀怪民主
ūn bái kuài bîn-tsú
路䆀怪選舉
lōo bái kuài suán-kú
一陣孤臣出孽子
tsi̍t-tīn koo-sîn tshut gia̍t-tsú
啊時機䆀
ah sî-ki bái
是誰咧烏白舞
sī siáng leh oo-pe̍h-bú
烏心的商品是滿滿是
oo-sim ê siong-phín sī muá-muá-sī
烏手愛出國才趁有錢
oo-tshiú ài tshut-kok tsiah thàn ū-tsînn
烏道佮政府咧BOT
oo-tō kah tsìng-hú leh BOT
烏物嘛的社會攏袂好天
oo mih-mà ê siā-huē lóng buē hó-thinn
白痴的頭家伊毋捌字
pe̍h-tshi ê thâu-ke i m̄ bat-jī
白賊的笑容是真歹治
pe̍h-tsha̍t ê tshiò-iông sī tsin pháinn tī
白目的規陣攏上電視
pe̍h-ba̍k ê kui-tīn lóng tsiūnn tiān-sī
白色的狗蟻才來抗議
pe̍h-sik ê káu-hiā tsiah lâi khòng-gī
人䆀怪爸母
lâng bái kuài pē-bú
命䆀怪政府
miā bái kuài tsìng-hú
先生䆀怪弟子
sian-sinn bái kuài tē-tsú
若起毛䆀
nā khí-moo bái
攏來烏白舞
lóng lâi oo-pe̍h-bú
運䆀怪廟宇
ūn bái kuài biō-ú
路䆀怪駕駛
lōo bái kuài kà-sú
三兩貓咬四斤鳥鼠
sann-niú niau kā sì-kin niáu-tshú
這台烏肚䆀
tsit tâi oo-tóo-bái
愛閣騎偌久
ài koh khiâ guā kú
烏暗的社會揣無頭路
oo-àm ê siā-huē tshē-bô thâu-lōo
烏西的行情愈來愈粗
oo-se ê hâng-tsîng jú lâi jú tshoo
烏市的人肉生理足好
oo-tshī ê lâng bah sing-lí tsiok hó
烏面的包公
oo-bīn ê Pau-kong
你是死去佗
lí sī sí khì toh
白白布予人染甲烏
pe̍h-pe̍h pòo hōo-lâng ní kah oo
白菜一斤愛幾若十箍
pe̍h-tshài tsi̍t-kun ài kuí-lō tsa̍p khoo
一粒頭攏白頭毛
tsi̍t-lia̍p thâu lóng pe̍h thâu-mn̂g
白帖仔一疊
pe̍h-thiap-á tsi̍t-tha̍h
敢會孝孤
kám ē hàu-koo
人䆀怪爸母
lâng bái kuài pē-bú
命䆀怪政府
miā bái kuài tsìng-hú
身體䆀擋袂久
sin-thé bái tòng bē kú
啊若姿勢䆀
ah nā tsu-sè bái
規氣烏白舞
kui-khì oo-pe̍h-bú
人䆀怪爸母
lâng bái kuài pē-bú
命䆀怪政府
miā bái kuài tsìng-hú
景氣䆀䆀太久
kíng-khì bái bái thài kú
恁爸起毛䆀
lín-pē khí-moo bái
是恁咧烏白舞
sī lín leh oo-pe̍h-bú
