春夏秋冬

《春夏秋冬》Tshun-hā-tshiu-tang

邱詩凌Khu Si-lîng (馬來西亞)

——————————————

春花開滿這个家

tshun-hue khui buán tsit ê ke

感謝有你來同齊

kám-siā ū lí lâi tâng-tsê

你的手有我來牽

lí ê tshiú ū guá lâi khan

用我的溫柔來攬

iōng guá ê un-jiû lâi lám

夏天落來一陣雨

hā-thinn lo̍h lâi tsi̍t-tsūn hōo

揣無你的街仔路

tshuē-bô lí ê ke-á-lōo

目屎透著西北雨

ba̍k-sái thàu tio̍h sai-pak-hōo

予我心情澹糊糊

hōo guá sim-tsîng tâm kôo-kôo

秋風夜雨彼一暝

tshiu-hong iā-ú hit tsi̍t-mê

思思念念你一个

su-su-liām-liām lí tsi̍t-ê

想欲佮你來做伙

siūnn-beh kah lí lâi tsò-hué

望你轉來仝一家

bāng lí tńg-lâi kāng tsi̍t-ke

—

冬雪紛飛滿厝頂

tang-seh hun-pue muá tshù-tíng

冷風酸疼凍心冷

líng-hong sng-thiànn tàng sim líng

樹枝孤鳥等待你

tshiū-ki koo-tsiáu tán-thāi lí

春夏秋冬閣一年

tshun-hā-tshiu-tang koh tsi̍t-nî

春夏秋冬閣三年

tshun-hā-tshiu-tang koh sann-nî

春夏秋冬過十年

tshun-hā-tshiu-tang kuè tsa̍p-nî