眠夢嘛好

《眠夢嘛好》Bîn-bāng Mā Hó
林翠萍Lîm Tshuì-phîng
——————————————
雖然時常予阮來眠夢
sui-jiân sî-siông hōo gún lâi bîn-bāng
干焦眠夢
kan-na bîn-bāng
心情袂輕鬆
sim-tsîng buē khin-sang
到底你為著啥事項
tàu-té lí uī-tio̍h siánn sū-hāng
忍心放阮心苦痛
jím-sim pàng gún sim khóo thàng

彼時對阮情義重
hit-sî tuì gún tsîng-gī tāng
情義重
tsîng-gī tāng
無疑你會走去藏
bô-gî lí ē tsáu-khì tshàng
無疑你會
bô-gî lí ē
佮著阮來分西東
kah tio̍h gún lâi hun se-tang

月也心茫茫
gue̍h iā sim bâng-bâng
無心來幫忙
bô-sim lâi pang-bâng
只好靠眠夢
tsí-hó khò bîn-bāng
見著你一人
kìnn-tio̍h lí tsi̍t-lâng