等你跤步聲

《等你跤步聲》Tán Lí Kha-pōo-siann

林晏如Lîm Àn-jû

——————————————

摸心肝

bong sim-kuann

哭無聲

khàu bô-siann

恬恬送你越頭行

tiām-tiām sàng lí ua̍t-thâu kiânn

明明心疼若刀割

bîng-bîng sim thiànn ná to kuah

笑笑目屎吞就焦

tshiò-tshiò ba̍k-sái thun tsiū ta

感情路咱行到遮

kám-tsîng-lōo lán kiânn kàu tsia

硬欲繼續

ngē beh kè-sio̍k

只有加拖磨

tsí-ū ke thua-buâ

放你自由去快活

pàng lí tsū-iû khì khuìnn-ua̍h

較艱苦

khah kan-khóo

阮來擔

gún lâi tann

含著被單

kâm tio̍h phuē-tuann

將阮所有的心聲

tsiong gún sóo-ū ê sim-siann

講予枕頭聽

kóng hōo tsím-thâu thiann

一段袂煞

tsi̍t-tuānn buē suah

已經規攤澹了又焦

í-king kui thuann tâm liáu iū ta

免人安慰免人扞

bián lâng an-uì bián lâng huānn

放予跤步懸低踏

pàng hōo kha-pōo kuân-kē ta̍h

偏偏行到搭

phian-phian kiânn kàu tah

攏有音樂聲

lóng ū im-ga̍k-siann

親像咧叫你的名

tshin-tshiūnn teh kiò lí ê miâ

毋知影到底欲怎樣

m̄ tsai-iánn tàu-té beh tsuánn-iūnn

傷痕深到抾袂峇

siong-hûn tshim kàu khioh buē bā

目睭眯眯看

ba̍k-tsiu bî-bî khuànn

耳空硞硞聽

hīnn-khang kho̍k-kho̍k thiann

戇戇等你跤步聲

gōng-gōng tán lí kha-pōo-siann