斷夢花

《斷夢花》Tuān-bāng-hue
林英美Lîm Ing-bí
——————————————
怎樣來哀啼
tsuánn-iūnn lâi ai-thî
怎樣來自嘆自悲
tsuánn-iūnn lâi tsū-thàn tsū-pi
已經是親像薔薇
í-king sī tshin-tshiūnn tshiûnn-bî
受風吹離枝
siū hong tshe lī ki
失了青春失芳味
sit liáu tshing-tshun sit phang-bī
無法再團圓
bô-huat tsài thuân-înn
心茫茫想起當時
sim bâng-bâng siūnn-khí tong-sî
初戀情甘甜
tshoo-luân tsîng kam-tinn
佇房內珠淚一滴
tī pâng-lāi tsu-luī tsi̍t-tih
滴落樓窗邊
tih lo̍h lâu-thang pinn

怎樣來想伊
tsuánn-iūnn lâi siūnn i
怎樣來情意綿綿
tsuánn-iūnn lâi tsîng-ì mî-mî
一旦來斷了情絲
it-tàn lâi tn̄g liáu tsîng-si
佮伊離千里
kah i lī tshian-lí
一切期待完全是
it-tshè kî-thāi uân-tsuân sī
枉費了心機
óng-huì liáu sim-ki
彼一暝雙人熱意
hit tsi̍t-mî siang-lâng jia̍t-ì
接吻的氣味
tsiap-bún ê khì-bī
只有是留在喙邊
tsí-ū sī lâu tsāi tshuì-pinn
加添心空虛
ka-thiam sim khang-hi

怎樣來哀啼
tsuánn-iūnn lâi ai-thî
怎樣來懷念情義
tsuánn-iūnn lâi huâi-liām tsîng-gī
已經是親像月暝
í-king sī tshin-tshiūnn ge̍h-mî
花蕊露水滴
hue-luí lōo-tsuí tih
過了這暗黎明時
kè-liáu tsit àm lê-bîng sî
就會消失去
tsiū ē siau-sit–khì
夢醒了情火又是
bāng tshínn liáu tsîng-hé iū sī
炎炎燒不離
iām-iām sio put-lī
熱紅紅宛然窗邊
jia̍t âng-âng uán-jiân thang-pinn
彼蕊紅薔薇
hit luí âng tshiûnn-bî