有你做伙

《有你做伙》Ū Lí Tsò-phuānn

林子娟Lîm Tsú-kuan

——————————————

食了遮濟歲

tsia̍h-liáu tsiah tsuē huè

好䆀嘛已經看真濟

hó-bái mā í-king khuànn tsin tsuē

人情冷暖也攏拄過

jîn-tsîng líng-luán iā lóng tú–kuè

定定一个人思考

tiānn-tiānn tsi̍t-ê-lâng su-khó

人生的問題

jîn-sing ê būn-tuê

原來上驚家己一个

guân-lâi siōng kiann ka-kī tsi̍t-ê

食了遮濟歲

tsia̍h-liáu tsiah tsuē huè

恩怨是非嘛拄真濟

un-uàn sī-hui mā tú tsin tsuē

人生也攏愛過恨過

jîn-sing iā lóng ài–kuè hūn–kuè

有真心的人

ū tsin-sim ê lâng

世間永遠上歹揣

sè-kan íng-uán siōng pháinn tshuē

有你照顧毋驚空白

ū lí tsiàu-kòo m̄-kiann khàng-pe̍h

有你做伙

ū lí tsuè-hué

永遠毋驚講無話

íng-uán m̄-kiann kóng bô uē

好䆀總是有你來陪

hó-bái tsóng-sī ū lí lâi puê

人生的路只有一回

jîn-sing ê lōo tsí-ū tsi̍t-huê

有你照顧毋驚坎坷

ū lí tsiàu-kòo m̄-kiann khám-khia̍t

有你做伙

ū lí tsuè-hué

共阮安慰佮鼓勵

kā gún an-uì kah kóo-lē

有你關心勝過一切

ū lí kuan-sim sìng-kuè it-tshè

毋管好䆀做伙度過

m̄-kuán hó-bái tsò-hué tōo-kuè

咱攏是上媠的一蕊花

lán lóng-sī siōng suí ê tsi̍t-luí hue