山盟

山盟San-bîng
歹勢少年Pháinn-sè Siàu-liân（拍謝少年Sorry Youth）

——————————————

我送你去深山林內了後
Guá sàng lí khì tshim-suann-nâ-lāi liáu-āu
風雨微微只有月娘照看
Hong-hōo bî-bî tsí-ū gue̍h-niû tsiò-khuànn
暗淡的心，惜別彼⼯
Àm-tām ê sim, sioh-pia̍t hit-kang
茫茫前程，心內驚惶
Bâng-bâng tsiân-tîng, sim-lāi kiann-hiânn
守護家園，決心踮佇遮啊
Siú-hōo ka-hn̂g, kuat-sim tiàm tī tsia–ah

失去過去平凡日子了後
Sit-khì kuè-khì pîng-huân ji̍t-tsí liáu-āu
重新來過，更加認份過活
Tiông-sin lâi-kuè, kìng-ka jīn-hūn kuè-ua̍h
山盟海誓，約束的人
San-bîng-hái-sè, iok-sok ê lâng
牽手做伴、慢慢來行
Khan-tshiú tsuè-phuānn, bān-bān lâi kiânn
美麗島嶼，相依鬥陣變老
Bí-lē tó-sū, siong-i tàu-tīn piàn láu

睏袂去的暗暝，飛去幽暗的山林
Khùn-buē-khì ê àm-mî, pue-khì iu-àm ê suann-nâ
毋知終點佇佗位，揣無輕鬆的跤步
M̄-tsai tsiong-tiám tī tó-uī, tshuē-bô khin-sang ê kha-pōo
啥人咧喝阮的名，若有看著你形影
Siánn-lâng leh huah gún ê miâ, nā-ū khuànn-tio̍h lí hîng-iánn
輕聲細說講袂煞，海是上深天上闊
Khin-siann-sè-sueh kóng bē-suah, hái sī siōng tshim thinn siōng khuah

條直的人行仝款的路
Tiâu-ti̍t ê lâng kiânn kāng-khuán ê lōo
佇烏暗暝閃爍啊
Tī oo-àm-mê siám-sih–ah

疼惜的心牽起你我
Thiànn-sioh ê sim khan-khí lí-guá
行同齊來堅持啊
Kiânn tâng-tsê lâi kian-tshî–ah

清醒的人是真正⼤聲喝
Tshing-tshénn ê lâng sī tsin-tsiànn tuā-siann huah
守護的夢是人人徛佇遮
Siú-hōo ê bāng sī lâng-lâng khiā tī tsia

是我
Sī guá