一跤破皮箱
《一跤破皮箱》Tsit-kha Phuà Phuê-siunn
良山Liông-san
——————————————
捾一跤的紅皮箱
kuānn tsi̍t-kha ê âng phê-siunn
流浪著海角天邊
liû-lōng tio̍h hái-kak thinn-pinn
到今日想欲倒轉去
kàu kim-ji̍t siūnn-beh tò-tńg–khì
因何心稀微
in-hô sim hi-bî
彼當時離開故鄉
hit-tong-sî lī-khui kòo-hiong
希望會得出頭天
hi-bāng ē-tit tshut-thâu-thinn
誰知阮身邊只有
siáng tsai gún sin-pinn tsí-ū
一跤破皮箱
tsi̍t-kha phuà phuê-siunn
一跤破皮箱
tsi̍t-kha phuà phuê-siunn
在故鄉的彼一暝
tsāi kòo-hiong ê hit tsi̍t-mî
流目屎佮阮分離
lâu ba̍k-sái kah gún hun-lî
叫阮著認真去拍拚
kiò gún tio̍h jīn-tsin khì phah-piànn
彼个好情侶
hit ê hó tsîng-lī
看見著阮的模樣
khuànn-kìnn tio̍h gún ê bôo-iūnn
一定會來心酸悲
it-tīng ē lâi sim sng-pi
因為阮身邊只有
in-uī gún sin-pinn tsí-ū
一跤破皮箱
tsi̍t-kha phuà phuê-siunn
一跤破皮箱
tsi̍t-kha phuà phuê-siunn
談愛情的鐵線橋
tâm ài-tsîng ê thih-suànn-kiô
猶原猶搖來搖去
iu-guân iáu iô lâi iô khì
歡迎著流浪倒轉來
huan-gîng tio̍h liû-lōng tò-tńg–lâi
無聊的男兒
bô-liâu ê lâm-jî
甘願來攑著鋤頭
kam-guān lâi gia̍h tio̍h tî-thâu
毋願佮伊再離開
m̄-guān kah i tsài lī-khui
雖然阮身邊只有
sui-jiân gún sin-pinn tsí-ū
一跤破皮箱
tsi̍t-kha phuà phuê-siunn
一跤破皮箱
tsi̍t-kha phuà phuê-siunn
