青春的夢

《青春的夢》Tshing-tshun ê Bāng

秀蘭瑪雅Showlen Maya

——————————————

踮佇這个冷暖的世間

tiàm-tī tsit ê líng-luán ê sè-kan

真情真意漸漸退色

tsin-tsîng tsin-ì tsiām-tsiām thè-sik

一句食飽猶未

tsi̍t-kù tsia̍h-pá iáu buē

足久毋捌閣聽

tsiok kú m̄-bat koh thiann

人情味哪愈來愈薄汫

jîn-tsîng-bī ná jú lâi jú po̍h-tsiánn

海風吹來鹹鹹的滋味

hái-hong tshue-lâi kiâm-kiâm ê tsu-bī

鼻著少年純純的情味

phīnn-tio̍h siàu-liân sûn-sûn ê tsîng-bī

一句真心我愛你

tsi̍t-kù tsin-sim guá ài lí

痴心等待你

tshi-sim tán-thāi lí

彼款純情

hit khuán sûn-tsîng

如今佗位去

jû-kim tó-uī khì

青春的夢

tshing-tshun ê bāng

若紅花變落葉

ná âng-hue piàn lo̍h-hio̍h

我越頭看

guá ua̍t-thâu khuànn

時間伊毋捌歇

sî-kan i m̄-bat hioh

等愛的人

tán ài ê lâng

用一生換真心

iōng it-sing uānn tsin-sim

望伊牽手

bāng i khan-tshiú

咱做伙來行

lán tsuè-hué lâi kiânn