驚某歌

《驚某歌》Kiann-bóo Kua
李清風Lí Tshing-hong
——————————————
接著媠娘電話到
tsiap-tio̍h suí-niû tiān-uē kàu
驚心話講袂透流
kiann-sim uē kóng buē thàu-lâu
阮某徛在尻川後
gún bóo khiā tsāi kha-tshng-āu
講著強欲大舌猴
kóng tio̍h kiōng-bueh tuā-tsi̍h-kâu

驚某有影見笑代
kiann-bóo ū-iánn kiàn-siàu-tāi
厝邊以外無人知
tshù-pinn í-guā bô-lâng tsai
對人面前激大派
tuì lâng bīn-tsîng kik tuā-phài
透暝刑罰毋敢哀
thàu-mî hîng-hua̍t m̄-kánn ai

猛虎踮在房間內
bíng-hóo tiàm-tsāi pâng-king lāi
半暝展威無人知
puànn-mî thián-ui bô-lâng tsai
有時驚到心肝歹
ū-sî kiann kàu sim-kuann phái
陷眠不時喝虎來
hām-bîn put-sî huah hóo lâi

驚某條件難得算
kiann-bóo tiâu-kiānn lân-tit sǹg
上害暗轉上無長
siōng hāi àm tńg siōng bô tn̂g
若有一暗傷暗轉
nā ū tsi̍t-àm siunn àm tńg
就罰三暗無出門
tsiū hua̍t sann-àm bô tshut-mn̂g

驚某不時魂吊吊
kiann-bóo put-sî hûn tiàu-tiàu
鬱悶在心氣袂消
ut-būn tsāi sim khì buē siau
外頭夆知真見笑
guā-thâu hông tsai tsin kiàn-siàu
親像鳥鼠見著貓
tshin-tshiūnn niáu-tshú kìnn-tio̍h niau