永遠的故鄉

《永遠的故鄉》Íng-uán ê Kòo-hiong

李郁茹Lî Hiok-jû

——————————————

看著是茫茫的海水

khuànn tio̍h sī bâng-bâng ê hái-tsuí

思念是遠遠的故鄉

su-liām sī hn̄g-hn̄g ê kòo-hiong

三十年飛鳥咧流浪

sann-tsa̍p nî pue-tsiáu teh liû-lōng

故鄉我的故鄉

kòo-hiong guá ê kòo-hiong

鼻著是芬芳的花味

phīnn tio̍h sī hun-hong ê hue-bī

風吹是靜靜的故鄉

hong tshue sī tsīng-tsīng ê kòo-hiong

一兩欉蓮霧咧開花

tsi̍t-nn̄g tsâng lián-bū leh khui-hue

故鄉我的故鄉

kòo-hiong guá ê kòo-hiong

照著是白白的月光

tsiò tio̍h sī pe̍h-pe̍h ê gue̍h-kng

出日是美麗的故鄉

tshut ji̍t sī bí-lē ê kòo-hiong

三四甲稻仔咧結穗

sann-sì kah tiū-á teh kiat-suī

故鄉我的故鄉

kòo-hiong guá ê kòo-hiong

聽著是近近的笑聲

thiann tio̍h sī kīn-kīn ê tshiò-siann

做夢是細漢的故鄉

tsuè-bāng sī suè-hàn ê kòo-hiong

五六隻田嬰咧耍水

gōo-la̍k tsiah tshân-inn leh sńg-tsuí

故鄉我的故鄉

kòo-hiong guá ê kòo-hiong

踏著是青青的土地

ta̍h tio̍h sī tshinn-tshinn ê thóo-tē

希望是永遠的故鄉

hi-bāng sī íng-uán ê kòo-hiong

每一遍心內咧叫你

muí tsi̍t-piàn sim-lāi leh kiò lí

故鄉永遠的故鄉

kòo-hiong íng-uán ê kòo-hiong