一杯茶
《一杯茶》Tsi̍t-pue Tê
李明洋Lí Bîng-iông
——————————————
一杯茶啊傳情義
tsi̍t-pue tê–ah thuân tsîng-gī
相招朋友來鬥陣
sio-tsio pîng-iú lâi tàu-tīn
燒燒一杯捀予你
sio-sio tsi̍t-pue phâng hōo lí
心內話講予你知
sim-lāi-uē kóng hōo lí tsai
一杯茶啊甘甜味
tsi̍t-pue tê–ah kam-tinn bī
天南地北講規暝
thian-lâm tē-pak kóng kui-mî
塗豆瓜子嘛愛佮
thôo-tāu kue-tsí mā ài kah
一杯茶啊一世情
tsi̍t-pue tê–ah tsi̍t-sè tsîng
這杯茶啊捀予你
tsit pue tê–ah phâng hōo lí
用心交陪無計較
iōng-sim kau-puê bô kè-kàu
你的心事
lí ê sim-sū
我的心聲
guá ê sim-siann
朋友相伨鬥牽成
pîng-iú sio-thīn tàu khan-sîng
這杯茶啊捀予你
tsit pue tê–ah phâng hōo lí
人生好䆀總有時
jîn-sing hó-bái tsóng ū-sî
你若鬱卒來揣我
lí nā ut-tsut lâi tshuē guá
用心為你泡一杯茶
iōng-sim uī lí phàu tsi̍t-pue tê