紅線
《紅線》Âng-suànn
李明洋Lí Bîng-iông
——————————————
厝內無你的影
tshù-lāi bô lí ê iánn
我揣無內衫
guá tshuē-bô lāi-sann
灶跤無你的汗
tsàu-kha bô lí ê kuānn
飯菜失鹹汫
pn̄g-tshài sit kiâm-tsiánn
感謝囥在心肝
kám-siā khǹg tsāi sim-kuann
悲歡有你做伴
pi-huan ū lí tsuè-phuānn
一粒目屎
tsi̍t-lia̍p ba̍k-sái
為你換心笑一聲
uī lí uānn-sim tshiò tsi̍t-siann
無論人生欲對佗行
bô-lūn jîn-sing beh tuì toh kiânn
咱的情有天咧看
lán ê tsîng ū thinn teh khuànn
咱的愛用四季寫
lán ê ài iōng sù-kuì siá
咱的夢浸在月影
lán ê bāng tsìm tsāi gue̍h-iánn
無論人生欲佗位煞
bô-lūn jîn-sing beh tó-uī suah
咱的路堅心來行
lán ê lōo kian-sim lâi kiânn
咱的愛今生毋換
lán ê ài kim-sing m̄-uānn
咱的命喘氣仝聲
lán ê miā tshuán-khuì kāng siann
感謝天地為證
kám-siā thinn-tē uī tsìng
日月牽線
ji̍t-gua̍t khan-suànn