今年愛比舊年好
《今年愛比舊年好》Kin-nî Ài Pí Kū-nî Hó
小黑(Raju Kumara，馬來西亞)
——————————————
新的一年
sin ê tsi̍t-nî
緊來回鄉過新年喔
kín lâi huê-hiong kuè sin-nî–ooh
厝頭厝邊
tshù-thâu tshù-pinn
人人真歡喜
lâng-lâng tsin huann-hí
爸爸媽媽派紅包
pá-pah má-mah phài âng-pau
笑咪咪
tshiò bi-bi
這个紅包
tsit ê âng-pau
予恁今年過好年
hōo lín kin-nî kuè hó-nî
大人囡仔提著紅包
tuā-lâng gín-á the̍h tio̍h âng-pau
笑咪咪
tshiò bi-bi
新的一年
sin ê tsi̍t-nî
正月初一好日子
tsiann-ge̍h tshue-it hó ji̍t-tsí
厝頭厝邊炮聲
tshù-thâu tshù-pinn phàu-siann
響袂離
hiáng buē-lī
街頭巷尾
ke-thâu hāng-bué
舞獅舞龍弄袂停
bú-sai bú-lîng lāng buē-thîng
祝恁今年事業興旺
tsiok lín kin-nî sū-gia̍p heng-ōng
萬事如意
bān-sū jû-ì
祝恁今年讀書讀比舊年好
tsiok lín kin-nî tha̍k-tsu tha̍k pí kū-nî hó
祝恁逐家趁錢趁袂離
tsiok lín ta̍k-ke thàn-tsînn thàn buē-lī
今年一定愛比舊年好
kin-nî it-tīng ài pí kū-nî hó
祝恁大家趁錢趁袂離
tsiok lín tāi-ke thàn-tsînn thàn buē-lī
親情朋友
tshin-tsiânn pêng-iú
歡歡喜喜乾一杯
huann-huann-hí-hí kan tsi̍t-pue
啊恭喜你
ah kiong-hí lí
祝福你
tsiok-hok lí
今年愛比舊年好
kin-nî ài pí kū-nî hó
