毋通入歧途
《毋通入歧途》M̄-thang Ji̍p Kî-tôo
洪小凌Âng Sió-lîng(新加坡)
——————————————
想起細漢彼當時
siūnn-khí suè-hàn hit-tong-sî
無聽爸母的教示
bô thiann pē-bú ê kà-sī
無愛讀書無愛寫字
bô-ài tha̍k-tsu bô-ài siá-jī
每日拍遨里
muí-ji̍t phah gô-lí
等到考試彼當時
tán-kàu khó-tshì hit-tong-sî
分數全紅字
hun-sòo tsuân âng-jī
想著讀書全無趣味
siūnn-tio̍h tha̍k-tsu tsuân bô tshù-bī
先生氣到半死
sian-sinn khì kàu puànn-sí
時間一年一年過去
sî-kan tsi̍t-nî-tsi̍t-nî kuè–khì
已經十八的年紀
í-king tsa̍p-pueh ê nî-kí
每日佮人學洋基
muí-ji̍t kah lâng o̍h iâng-ki
啉酒燒薰枝
lim-tsiú sio hun-ki
學人Party毋三毋四
o̍h lâng Party m̄-sann-m̄-sì
去到規半暝
khì kàu kui puànn-mî
絞群結黨相拍拚水
ká-kûn kiat-tóng sio-phah piànn-tsuí
結果監牢扳鐵枝
kiat-kó kann-lô pinn thih-ki
關在監牢才知知
kuainn tsāi kann-lô tsiah tsai-ti
痛苦心酸的滋味
thòng-khóo sim sng ê tsu-bī
每日曝日做苦工
muí-ji̍t pha̍k-ji̍t tsuè khóo-kang
實在無捨施
si̍t-tsāi bô-siá-si
怨嘆當初無聽教示
uàn-thàn tong-tshue bô thiann kà-sī
想著喉就滇
siūnn-tio̍h âu tsiū tīnn
勸咱朋友著愛覺悟
khǹg lán pîng-iú tio̍h-ài kak-gōo
千萬毋通入歧途
tshian-bān m̄-thang ji̍p kî-tôo
