戇戇
《戇戇》Gōng-gōng
CHEN Z
——————————————
是運抑是命
sī ūn a̍h-sī miā
家己故事家己寫
ka-kī kòo-sū ka-kī siá
是命抑是運
sī miā a̍h-sī ūn
若是無路家己行
nā-sī bô-lōo ka-kī kiânn
軟汫的戇囝
nńg-tsiánn ê gōng-kiánn
綿茫毋知咧創啥
mî-bâng m̄-tsai leh tshòng siánn
唱的只是頭殼裡的聲
tshiùnn–ê tsí-sī thâu-khak–lìn ê siann
毋知有誰聽
m̄-tsai ū siáng thiann
I don’t know
我是人的誰
guá sī lâng ê siáng
活佇誰的影
ua̍h tī siáng ê iánn
經過的風景
king-kuè ê hong-kíng
一幕一幕親像電影
tsi̍t-bōo-tsi̍t-bōo tshin-tshiūnn tiān-iánn
翕過的相片
hip–kuè ê siòng-phìnn
一張一張翕的是誰
tsi̍t-tiunn-tsi̍t-tiunn hip–ê sī siáng
心臟的礗礗磅磅咧跳
sim-tsōng ê pin-pin-pōng-pōng leh thiàu
無咧為誰
bô leh uī siáng
戇戇踅啊戇戇踅啊
gōng-gōng se̍h–ah gōng-gōng se̍h–ah
揣無路的人
tshuē-bô lōo ê lâng
戇戇綴啊戇戇綴啊
gōng-gōng tuè–ah gōng-gōng tuè–ah
無方向的人
bô hong-hiòng ê lâng
想欲物件傷濟矣
siūnn-beh mi̍h-kiānn siunn tsē–ah
添袂滿的空
thinn bē-muá ê khang
心臟若是袂閣振動
sim-tsōng nā-sī bē koh tín-tāng
閣敢會有夢
koh kám ē ū bāng
—
袂閣感覺按怎
buē koh kám-kak án-nuá
外口聲音紛紛擾擾
guā-kháu siann-im hun-hun-jiáu-jiáu
袂閣感覺綿茫
buē koh kám-kak mî-bâng
浮浮沉沉茫茫渺渺
phû-phû-tîm-tîm bông-bông-biáu-biáu
莫有遺憾
mài ū uî-hām
克服阻礙
khik-ho̍k tsóo-gāi
莫閣怨嘆
mài koh uàn-thàn
袂閣有困難
bē koh ū khùn-lân
袂閣為誰肯定期待
bē koh uī siáng khíng-tīng kî-thāi
答案攏是為著愛
tap-àn lóng-sī uī-tio̍h ài
為夢拍拚的路
uī bāng phah-piànn ê lōo
這若算做食苦
tse nā sǹg-tsò tsia̍h-khóo
嘛會當做食補
mā ē tòng-tsò tsia̍h-póo
過程的考驗
kuè-tîng ê khó-giām
攏會變成覺悟
lóng ē piàn-sîng kak-ngōo
平靜的心
pîng-tsīng ê sim
才有法度真正感受快樂
tsiah ū huat-tōo tsin-tsiànn kám-siū khuài-lo̍k
戇戇仔行嘛有法度
gōng-gōng-á kiânn mā ū huat-tōo
行出家己的路
kiânn tshut ka-kī ê lōo
戇戇踅啊戇戇踅啊
gōng-gōng se̍h–ah gōng-gōng se̍h–ah
揣著路的人
tshuē-tio̍h lōo ê lâng
戇戇綴啊戇戇綴啊
gōng-gōng tuè–ah gōng-gōng tuè–ah
有方向的人
ū hong-hiòng ê lâng
來到世界
lâi-kàu sè-kài
攏是有因有果無相仝
lóng-sī ū in ū kó bô sio-kāng
親像每一蕊花
tshin-tshiūnn muí tsi̍t-luí hue
攏是無仝款的芳
lóng-sī bô kāng-khuán ê phang
