退色的記持
《退色的記持》Thè-sik ê Kì-tî
程美玉Thiânn Bí-gio̍k(如玉Jû-gio̍k)
——————————————
老時鐘行無停
lāu sî-tsing kiânn bô-thîng
行袂轉去以前
kiânn buē tńg-khì í-tsîng
無人的眠床頂
bô-lâng ê bîn-tshn̂g-tíng
留著一領破被單
lâu tio̍h tsi̍t-niá phuà phuē-tuann
照著鏡霧霧
tsiò tio̍h kiànn bū-bū
親像咧搬退色的電影
tshin-tshiūnn teh puann thè-sik ê tiān-iánn
我攑頭問月光
guá gia̍h-thâu mn̄g gue̍h-kng
月娘恬恬無應聲
gue̍h-niû tiām-tiām bô ìn-siann
風對門縫鑽入
hong tuì mn̂g-phāng tsǹg-ji̍p
飛來一張舊相片
pue lâi tsi̍t-tiunn kū siòng-phìnn
厝角的蜘蛛絲
tshù-kak ê ti-tu-si
黏著咱的記持
liâm tio̍h lán ê kì-tî
日頭曝著
ji̍t-thâu pha̍k tio̍h
無人行過的磚仔埕
bô-lâng kiânn–kuè ê tsng-á-tiânn
往事像露水
óng-sū tshiūnn lōo-tsuí
透早就消失無影
thàu-tsá tiō siau-sit bô-iánn
