寒冬的暗暝
《寒冬的暗暝》Hân-tang ê Àm-mî
程美玉Thiânn Bí-gio̍k(如玉Jû-gio̍k)
——————————————
寒冬的暗暝
hân-tang ê àm-mî
風吹冷吱吱
hong-tshue líng ki-ki
孤單坐在公園的牆仔邊
koo-tuann tsē tsāi kong-hn̂g ê tshiûnn-á-pinn
毋知影
m̄ tsai-iánn
是我重情想袂開
sī guá tiōng-tsîng siūnn buē-khui
抑是你
ia̍h-sī lí
絕情絕義來離開
tsua̍t-tsîng tsua̍t-gī lâi lī-khui
看著兩人較早的舊相片
khuànn-tio̍h nn̄g-lâng khah-tsá ê kū siòng-phìnn
毋願來放棄
m̄-guān lâi hòng-khì
猶原咧想你
iu-guân teh siūnn lí
明知只賰回憶
bîng-tsai tsí tshun huê-ik
偏偏袂當放袂記
phian-phian buē-tàng pàng-buē-kì
將你囥在
tsiong lí khǹg tsāi
心內上深的所在
sim-lāi siōng tshim ê sóo-tsāi
