歹囝浪蕩
《歹囝浪蕩》Pháinn-kiánn Lōng-tōng
游琦光Iû Kî-kong
——————————————
薰屎擲落地
hun-sái tàn lo̍h-tē
月色照西窗
gue̍h-sik tsiò se-thang
半生囂俳
puàn-sing hiau-pai
換來滿身傷痕
uānn lâi muá-sin siong-hûn
歹囝浪蕩
pháinn-kiánn lōng-tōng
回頭誰收留
huê-thâu siáng siu-liû
糊塗的過去
hôo-tôo ê kuè-khì
斬斷
tsám-tn̄g
重新做人
tiông-sin tsuē-lâng
酒氣隨風飛
tsiú-khì suî hong pue
莫閣再留戀
mài koh-tsài liû-luân
手內的家私
tshiú-lāi ê ke-si
換做菜刀鏘
uānn-tsò tshài-to khiang
暗暝的惡夢
àm-mî ê ok-bāng
輕輕共伊放
khin-khin kā-i pàng
風雨我來擋
hong-hōo guá lâi tòng
咱的家我來晟
lán ê ke guá lâi tshiânn
江湖的這齣戲若煞
kang-ôo ê tsit tshut hì nā suah
最後一幕
tsuè-āu tsi̍t-bōo
是溫柔的黃昏
sī un-jiû ê hông-hun
歲月換覺悟
suè-gua̍t uānn kak-gōo
青春已經無
tshing-tshun í-king bô
當初少年
tong-tshoo siàu-liân
如今面上留皺痕
jû-kim bīn-siōng lâu jiâu-hûn
