感情囥佗一爿
《感情囥佗一爿》Kám-tsîng Khǹg Tó Tsi̍t-pîng
曾瑋中Tsan Uí-tiong/Kuljelje
——————————————
咱相約中正路的路邊
lán sio-iok Tiong-tsìng-lōo ê lōo-pinn
巷仔口檳榔擔看板下面
hāng-á-kháu pin-nn̂g-tànn kha̋ng-pàng ē-bīn
透中晝等到半暝三更
thàu-tiong-tàu tán-kah puànn-mî sann-kinn
塗跤的薰頭
thôo-kha ê hun-thâu
也已經一堆
iā í-king tsi̍t-tui
你寬寬行
lí khuan-khuan kiânn
倚我的身邊
uá guá ê sin-pinn
講咱的感情先囥一邊
kóng lán ê kám-tsîng sing khǹg tsi̍t-pinn
還我一支鎖匙
hîng guá tsi̍t-ki só-sî
破碎的相片
phò-tshuì ê siòng-phìnn
我哭甲險險仔斷氣
guá khàu kah hiám-hiám-á tn̄g-khuì
這是啥物劇情
tse sī siánn-mih kio̍k-tsîng
啥物過程
siánn-mih kuè-tîng
啥物原因
siánn-mih guân-in
啥物時陣
siánn-mih sî-tsūn
變做這款形
piàn-tsuè tsit khuán hîng
遮拄好
tsiah tú-hó
這間檳榔擔
tsit king pin-nn̂g-tànn
叫做感情囥一邊
kiò-tsuè kám-tsîng khǹg tsi̍t-pinn
我的感情
guá ê kám-tsîng
囥佗一爿
khǹg tó tsi̍t-pîng
放我的愛
pàng guá ê ài
無要無緊
bô-iàu-bô-kín
傷我的心
siong guá ê sim
看了無真
khuànn liáu bô tsin
敢講愛殘殘共醉予伊死
kám-kóng ài tshân-tshân kā tsuì hōo-i sí
我的感情
guá ê kám-tsîng
囥佗一爿
khǹg tó tsi̍t-pîng
你行佇中正路的頭前
lí kiânn tī Tiong-tsìng-lōo ê thâu-tsîng
我猶閣活佇咱的以前
guá iáu-koh ua̍h tī lán ê í-tsîng
走揣所有愛的可能
tsáu-tshuē sóo-ū ài ê khó-lîng
敢有可能
kám ū khó-lîng
