戲齣人生
《戲齣人生》Hì-tshut Jîn-sing
傅振輝Pòo Tsín-hui
——————————————
人生戲文啊隨人寫
jîn-sing hì-bûn–ah suî lâng siá
戲曲由在人去搬
hì-khik iû-tsāi lâng khì puann
起幕落幕戲終煞
khí-bōo lo̍h-bōo hì tsiong suah
精彩劇情如煙花
tsing-tshái kio̍k-tsîng jû ian-hua
–
人生靠勢得著名聲
jîn-sing khò-sè tit-tio̍h miâ-siann
難免看錢重性命
lân-bián khuànn tsînn tāng sìnn-miā
一步一步
tsi̍t-pōo-tsi̍t-pōo
寬寬仔行
khuann-khuann-á kiânn
身影四正毋驚斜
sin-iánn sì-tsiànn m̄-kiann tshiâ
毋通荏懶拍歹名聲
m̄-thang lám-nuā phah-pháinn miâ-siann
予人煽動牽咧行
hōo-lâng siàn-tōng khan teh kiânn
目的得著啥
bo̍k-ti̍k tit-tio̍h siánn
全身皮肉疼
tsuân-sin phuê-bah thiànn
榮華毀盡歹名聲
îng-huâ huí tsīn pháinn miâ-siann
毋是齊天大聖
m̄-sī Tsê-thian-tāi-sìng
毋是李哪吒
m̄-sī Lí Lô-tshia
反轉乾坤敢就會贏
huán-tsuán khiân-khun kám tiō ē iânn
邪步眾人驚
siâ-pōo tsìng-lâng kiann
正路偏毋行
tsiànn-lōo phian m̄-kiânn
按怎死的
án-tsuánn sí–ê
毋知影
m̄ tsai-iánn
人咧做
lâng teh tsuè
天咧看
thinn teh khuànn
悲劇落幕聲
pi-kio̍k lo̍h-bōo siann
