冤魂
《冤魂》Uan-hûn
陳秋山Tân Tshiu-san
——————————————
食完最後這頓飯
tsia̍h-uân tsuè-āu tsit tǹg pn̄g
吞落千古的冤屈
thun-lo̍h tshian-kóo ê uan-khut
清清白白的身份
tshing-tshing-pe̍h-pe̍h ê sin-hūn
今仔日坐上枉死船
kin-á-ji̍t tsē siōng óng-sí-tsûn
我是不孝的囝孫
guá sī put-hàu ê kiánn-sun
拖累厝內心鬱卒
thua-luī tshù-lāi sim ut-tsut
無奈總是歹命運
bô-nāi tsóng-sī pháinn miā-ūn
坎坎隙隙的青春
khám-khám-khik-khik ê tshing-tshun
啊~燒酒麻醉心頭恨
ah~ sio-tsiú bâ-tsuì sim-thâu hūn
醒來身軀已經離開阮
tshínn–lâi sin-khu í-king lī-khui gún
化做天頂的浮雲
huà-tsuè thinn-tíng ê phû-hûn
自由自在無憂悶
tsū-iû-tsū-tsāi bô iu-būn
食完最後這枝薰
tsia̍h-uân tsuè-āu tsit ki hun
吐出心內的冤屈
thóo-tshut sim-lāi ê uan-khut
茫茫渺渺的遊魂
bông-bông-biáu-biáu ê iû-hûn
明仔載飄浪回家門
bîn-á-tsài phiau-lōng huê ka-mn̂g
我是多餘的囝孫
guá sī to-î ê kiánn-sun
何必為我心頭酸
hô-pit uī guá sim-thâu sng
人生船過水無痕
jîn-sing tsûn kuè tsuí bô hûn
孤孤單單無人問
koo-koo-tuann-tuann bô-lâng mn̄g
啊~燒酒麻醉心頭恨
ah~ sio-tsiú bâ-tsuì sim-thâu hūn
醒來身軀已經離開阮
tshínn–lâi sin-khu í-king lī-khui gún
往事種種如浮雲
óng-sū tsióng-tsióng jû phû-hûn
生來死去真單純
sing lâi sú khì tsin tan-sûn
啊~燒酒麻醉心頭恨
ah~ sio-tsiú bâ-tsuì sim-thâu hūn
醒來身軀已經離開阮
tshínn–lâi sin-khu í-king lī-khui gún
往事種種如浮雲
óng-sū tsióng-tsióng jû phû-hûn
生來死去真單純
sing lâi sú khì tsin tan-sûn
放下手頭這枝薰
hòng-hā tshiú-thâu tsit ki hun
拜別爸母的大恩
pài-pia̍t pē-bú ê tāi-un
祈求世間無冤屈
kî-kiû sè-kan bô uan-khut
我是最後的冤魂
guá sī tsuè-āu ê uan-hûn
