大戇鯊
《大戇鯊》Tuā-gōng-sua
陳秋山Tân Tshiu-san
——————————————
生活佇溫暖的大海
sing-ua̍h tī un-luán ê tuā-hái
泅過這个藍色的世界
siû kuè tsit ê nâ-sik ê sè-kài
看盡海洋美麗的色彩
khuànn-tsīn hái-iông bí-lē ê sik-tshái
隨著潮流自由閣自在
suî tio̍h tiâu-liû tsū-iû koh tsū-tsāi
雖然是大隻的身材
sui-jiân sī tuā-tsiah ê sin-tsâi
生成扁扁闊喙真奇怪
senn-sîng pínn-pínn khuah-tshuì tsin kî-kuài
請欣賞我慢行的姿態
tshiánn him-sióng guá bān-hîng ê tsu-thài
天生自然翩翩的風采
thian-sing tsū-jiân phian-phian ê hong-tshái
啊~溫柔的大海
ah~ un-jiû ê tuā-hái
我是自由的存在
guá sī tsū-iû ê tsûn-tsāi
浸在無盡的世界
tsìm tsāi bû-tsīn ê sè-kài
啊~溫柔的大海
ah~ un-jiû ê tuā-hái
我是自由的存在
guá sī tsū-iû ê tsûn-tsāi
泅游到最遙遠的所在
siû-iû kàu tsuè iâu-uán ê sóo-tsāi
囚籠佇人類的館內
siû-lông tī jîn-luī ê kuán-lāi
踅圓箍仔千千萬萬擺
se̍h înn-khoo-á tshian-tshian-bān-bān pái
看無玻璃外口的世界
khuànn-bô po-lê guā-kháu ê sè-kài
是我一生不變的將來
sī guá it-sing put-piàn ê tsiong-lâi
雖然是溫馴的心懷
sui-jiân sī un-sûn ê sim-huâi
變成苦苦澀澀的無奈
piàn-sîng khóo-khóo-siap-siap ê bô-nāi
消瘦袂來增加著傷害
siau-sán buē lâi tsing-ka tio̍h siong-hāi
予我機會脫離著苦海
hōo guá ki-huē thuat-lî tio̍h khóo-hái
啊~溫柔的大海
ah~ un-jiû ê tuā-hái
懷念自由的存在
huâi-liām tsū-iû ê tsûn-tsāi
浸在無盡的世界
tsìm tsāi bû-tsīn ê sè-kài
啊~溫柔的大海
ah~ un-jiû ê tuā-hái
懷念自由的存在
huâi-liām tsū-iû ê tsûn-tsāi
泅游到最遙遠的所在
siû-iû kàu tsuè iâu-uán ê sóo-tsāi
