無聲的起行
《無聲的起行》Bô-siann ê Khí-kiânn
陳昭瑋Tân Tsiau-uí
——————————————
聽著四邊無情的炮聲
thiann-tio̍h sì-pinn bô-tsîng ê phàu-siann
叫阮愛起行
kiò gún ài khí-kiânn
離開我心愛的某囝
lī-khui guá sim-ài ê bóo-kiánn
坐上這班無回頭的車
tsē siōng tsit pan bô huê-thâu ê tshia
覕踮四邊烏暗的塗跤
bih tiàm sì-pinn oo-àm ê thôo-kha
使人心畏寒
sú-lâng sim uì-kuânn
窗外微微透入的光線
thang-guā bî-bî thàu ji̍p ê kng-suànn
照著我滿身塗粉的形影
tsiò tio̍h guá muá-sin thôo-hún ê hîng-iánn
這條路慢慢行
tsit tiâu lōo bān-bān kiânn
無說無聲
bô-sueh bô-siann
揹起千斤的重擔
phāinn khí tshian-kin ê tāng-tànn
毋驚生死
m̄-kiann senn-sí
為愛拚輸贏
uī ài piànn-su-iânn
啊~這條無添詞的歌
ah~ tsit tiâu bô thinn sû ê kua
唱著咱共同的運命
tshiùnn tio̍h lán kiōng-tông ê ūn-miā
烽火連天無時定
hong-hué liân-thian bô-sî tiānn
阮想欲轉去看某囝
gún siūnn-beh tńg-khì khuànn bóo-kiánn
啊~這條無方向的路線
ah~ tsit tiâu bô hong-hiòng ê lōo-suànn
指引咱青春的性命
tsí-ín lán tshing-tshun ê sìnn-miā
聽著路邊囡仔佇咧喝
thiann-tio̍h lōo-pinn gín-á tī-teh huah
我雄雄心碎
guá hiông-hiông sim suì
越頭哭無聲
ua̍t-thâu khàu-bô siann
—
啊~毋管犧牲有偌大
ah~ m̄-kuán hi-sing ū guā tuā
阮無顧一切
gún bô-kòo it-tshè
勇敢向前行
ióng-kám hiòng-tsiân kiânn
