二四孝
《二四孝》Jī-sì Hàu
陳金浪Tân Kim-lōng(新加坡)
——————————————
今日來唸二四孝
kim-ji̍t lâi liām jī-sì hàu
句句來抾起用紙包
kù-kù lâi khioh-khí iōng tsuá pau
朋友姊妹仔恁慢且跑
pîng-iú tsí-muē-á lín bān-tshiánn pháu
著學有孝才有𠢕
tio̍h o̍h iú-hàu tsiah ū gâu
咱有今日是佗位來
lán ū kim-ji̍t sī tó-uī lâi
十月懷胎腹肚內
tsa̍p-gue̍h huâi-thai pak-tóo-lāi
爸母的恩情是深如海
pē-bú ê un-tsîng sī tshim jû-hái
有孝爸母是應該
iú-hàu pē-bú sī ing-kai
咱來出世彼當時
lán lâi tshut-sì hit-tong-sî
紅紅幼幼是爸母飼
âng-âng iù-iù sī pē-bú tshī
有病有疼來顧規暝
ū pīnn ū thiànn lâi kòo kui-mî
問神拜佛去求名醫
mn̄g-sîn pài-hu̍t khì kiû bîng-i
不孝爸母是千毋通
put-hàu pē-bú sī tshian m̄-thang
好好去孝敬恁老大人
hó-hó khì hàu-kìng lín lāu-tuā-lâng
爸母恩情是真重
pē-bú un-tsîng sī tsin tāng
飼囝大漢著用苦工
tshī kiánn tuā-hàn tio̍h iōng khóo-kang
爸母飼囝的恩情
pē-bú tshī kiánn ê un-tsîng
千金萬兩也還袂清
tshian-kim bān-niú iā hîng buē-tshing
盡孝兩字來行頭前
tsīn-hàu nn̄g-jī lâi kiânn thâu-tsîng
較贏燒香去求神明
khah-iânn sio-hiunn khì kiû sîn-bîng
勸咱的大家啊著有孝
khǹg lán ê tāi-ke–ah tio̍h iú-hàu
奉敬欸爸母到年老
hōng-kìng–eh pē-bú kàu nî-lāu
時到若雙親百年後
sî kàu nā siang-tshin pah-nî āu
穿麻來戴孝送怹上山頭
tshīng-muâ lâi tì-hàu sàng in tsiūnn-suann-thâu
天理國法啊著遵守
thian-lí kok-huat–ah tio̍h tsun-siú
過去有做錯啊恁著緊收
kuè-khì ū tsò-tshò–ah lín tio̍h kín siu
知通來反悔啊閣猶有救
tsai thang lâi huán-hué–ah koh iáu-ū kiù
好好去孝順啊咱的爹娘啊
hó-hó khì hàu-sūn–ah lán ê tia-niû–ah
去孝順著咱的爹娘啊
khì hàu-sūn tio̍h lán ê tia-niû–ah
