原諒的歌
《原諒的歌》Guân-liōng ê Kua
陳昇Tân Sing
新寶島康樂隊 Sin Pó-tó Khong-lo̍k-tuī
——————————————
紅毛塗來摻沙
âng-mn̂g-thôo lâi tsham sua
沙仔倚著枋模
sua-á uá tio̍h pang-bôo
枋模嘛著愛鐵釘仔
pang-bôo mā tio̍h-ài thih-ting-á
來敆倚
lâi kap-uá
你佮我來相倚
lí kah guá lâi sio-uá
莫講咱是爛組
mài kóng lán sī nuā-tsoo
鬥陣來起大樓
tàu-tīn lâi khí tuā-lâu
人生在世界
jîn-sing tsāi sè-kài
有啥物通計較
ū siánn-mih thang kè-kàu
啊有影你比我較緣投
ah ū-iánn lí pí guá khah iân-tâu
貓猴變無魍
niau-kâu pìnn-bô-báng
毋通騎牛去北港
m̄-thang khiâ gû khì Pak-káng
啊換帖的
ah uānn-thiap–ê
心情著放輕鬆
sim-tsîng to̍h pàng khin-sang
第一身體健康
tē-it sin-thé kiān-khong
第二學問普通
tē-jī ha̍k-būn phóo-thong
第三戇
tē-sann gōng
種稻仔予政府磅
tsìng tiū-á hōo tsìng-hú pōng
莫牽拖莫虛華
mài khan-thua mài hi-hua
人人著第一名
lâng-lâng tio̍h tē-it-miâ
做牛著愛拖磨
tsuè gû to̍h-ài thua-buâ
做人著愛拍拚
tsuè-lâng tio̍h-ài phah-piànn
咱來唱這條原諒的歌
lán lâi tshiùnn tsit tiâu guân-liōng ê kua
庄跤彼爿有山
tsng-kha hit-pîng ū suann
山跤彼條爛路
suann-kha hit tiâu nuā-lōo
啊換帖若無計較
ah uānn-thiap nā bô kè-kàu
佮阮來做伴
kah guán lâi tsuè-phuānn
來唱彼條情歌
lâi tshiùnn hit tiâu tsîng-kua
伴著口琴的聲
phuānn tio̍h kháu-khîm ê siann
行彼條田岸仔
kiânn hit tiâu tshân-huānn-á
來食茶
lâi tsia̍h-tê
美麗的世界
bí-lē ê sè-kài
有啥物通計較
ū siánn-mih thang kè-kàu
啊有影四頓食甲遮腥臊
ah ū-iánn sì-tǹg tsia̍h kah tsiah tshe-tshau
天頂的火金蛄
thinn-tíng ê hué-kim-koo
笑阮這群痟查埔
tshiò gún tsit kûn siáu-tsa-poo
無煩惱兼愛出風頭
bô huân-ló kiam ài tshut-hong-thâu
第一悾來欶風
tē-it khong lâi suh-hong
第二悾撞球相碰
tē-jī khong tōng-kiû sio-pōng
第三悾寫歌予人搝
tē-sann khong siá kua hōo-lâng giú
莫膨風莫虛華
mài phòng-hong mài hi-hua
人人著第一名
lâng-lâng tio̍h tē-it-miâ
食無三把蕹菜
tsia̍h bô sann-pé ìng-tshài
毋通就來作怪
m̄-thang tō lâi tsok-kuài
硬欲柑仔換王梨
ngē beh kam-á uānn ông-lâi
第一身體健康
tē-it sin-thé kiān-khong
第二學問普通
tē-jī ha̍k-būn phóo-thong
第三戇
tē-sann gōng
食檳榔咧嘔紅
tsia̍h pin-nn̂g teh áu-hông
莫牽拖莫虛華
mài khan-thua mài hi-hua
人人著第一名
lâng-lâng tio̍h tē-it-miâ
做牛著愛拖磨
tsuè gû tio̍h-ài thua-buâ
做人著愛拍拚
tsuè-lâng tio̍h-ài phah-piànn
咱來唱這條原諒的歌
lán lâi tshiùnn tsit tiâu guân-liōng ê kua
