共藍天綠地留予囝孫
《共藍天綠地留予囝孫》Kā Nâ-thinn Li̍k-tē Lâu Hōo Kiánn-sun
郭金發Kueh Kim-huat
——————————————
天佇咧落酸雨
thinn tī-teh lo̍h sng-hōo
溪一日一日烏
khue tsi̍t-ji̍t-tsi̍t-ji̍t oo
啊山有人咧亂挖塗
ah suann ū-lâng teh luān óo-thôo
白翎鷥的目屎
pe̍h-līng-si ê ba̍k-sái
強欲焦枯
kiōng-beh ta-koo
啊老水牛
ah lāu tsuí-gû
揣無青青的草埔
tshuē-bô tshinn-tshinn ê tsháu-poo
揣無甜甜的草通好哺
tshuē-bô tinn-tinn ê tsháu thang-hó pōo
溪底的魚
khue-tué ê hî
克虧無跤通行路
khik-khui bô kha thang kiânn-lōo
食著汙水
tsia̍h-tio̍h ù-tsuí
可憐逐隻都反肚
khó-liân ta̍k-tsiah tio píng-tōo
啊雞仔早毋啼
ah ke-á tsá m̄ thî
晏也毋啼喔
uànn iā m̄ thî–ooh
專門啼彼號
tsuan-bûn thî hit-lō
中晝佮半晡
tiong-tàu kah puànn-poo
氣候閣也咧變常
khì-hāu koh iā teh piàn-siông
一熱就熱到欲四十度
tsi̍t-jua̍h tiō jua̍h kàu beh sì-tsa̍p tōo
害彼號狗仔
hāi hit-lō káu-á
熱甲喙舌吐吐
jua̍h kah tshuì-tsi̍h thóo-thóo
朋友啊朋友欸
pîng-iú–ah pîng-iú–eh
啊咱著趕緊
ah lán tio̍h kuánn-kín
來想看有啥物步
lâi siūnn-khuànn ū siánn-mih pōo
莫予伊天落酸雨
mài hōo i thinn lo̍h sng-hōo
莫予伊溪水日日烏
mài hōo i khue-tsuí ji̍t-ji̍t oo
莫予伊白翎鷥無厝通好蹛
mài hōo i pe̍h-līng-si bô tshù thang-hó tuà
莫予伊水牛揣無青草埔
mài hōo i tsuí-gû tshuē-bô tshinn-tsháu poo
逐家同心
ta̍k-ke tông-sim
逐家協力
ta̍k-ke hia̍p-li̍k
環境共照顧
khuân-kíng kā tsiàu-kòo
予咱囝囝孫孫
hōo lán kiánn-kiánn-sun-sun
有前途
ū tsiân-tôo
