酸米草
《酸米草》Sng-bí-tsháu
莉芝Lī-tsi
——————————————
今夜是
kim-iā sī
目箍酸的滋味
ba̍k-khoo sng ê tsu-bī
當做家己點著目藥水
tòng-tsuè ka-tī tiám tio̍h ba̍k-io̍h-tsuí
敢通勉強討回愛你兩字
kám thang bián-kióng thó huê ài lí nn̄g-jī
藏佇有酸米草的日記
tshàng tī ū sng-bí-tsháu ê ji̍t-kì
阮行著七步
gún kiânn tio̍h tshit-pōo
寫袂出斷腸詩
siá bē-tshut tuān-tn̂g-si
原來是用情太深
guân-lâi sī iōng tsîng thài tshim
太情痴
thài tsîng-tshi
你越頭七步
lí ua̍t-thâu tshit-pōo
了斷了花離枝
liáu-tuān liáu hue lî-ki
兩人之間
nn̄g-lâng tsi-kan
欠滴滴淚來添
khiàm tih-tih luī lâi thinn
為何一粒心啊
uī-hô tsi̍t-lia̍p sim–ah
疼攏袂止
thiànn lóng buē-tsí
為何閣期待著
uī-hô koh kî-thāi tio̍h
你回頭時
lí huê-thâu sî
